УИХ-ын гишүүн Ц.Сандаг-Очир "Тамирчдыг амжилт гаргасан үед нь нэг удаа урамшуулаад, сар бүр насан туршид нь урамшуулал олгодог байдлыг зогсооё" хэмээн Нийгмийн бодлогын байнгын хорооны хуралдаанд хэлсэн үг тамирчдын дургүйцлийг хүргэв.
Уг хуралдаанаар 2022 оны төсвийн тухай хуульд өөрчлөлт оруулах хуулийн төслийг хэлэлцсэн үед УИХ-ын гишүүн Ц.Сандаг-Очир "Олимп, дэлхийн аваргаас медаль хүртсэн тамирчдад сар бүр урамшуулал олгодог журмыг хасах саналтай байна. Тухайн үед нь медаль аваад ирэхэд нь улс эх орныхоо нэрийг гаргасан гээд нэг удаагийн урамшуулал олгоно уу гэхээс сар бүр урамшуулал олгоод байх нь утгагүй. Энэ бол хэмнэж болох зардал. Хэмнэлтийн бусад арга хэмжээ гэдэгт энэ хасах заалтыг оруулж өгнө үү" хэмээн санал гаргасанаа уламжласан юм.
Түүний хэлсэн үг Хүндийн өргөлтийн дэлхийн аварга М.Анхцэцэгээс эхлүүлээд бүх тамирчныг бухимдуулахад хүргэв.
М.Анхцэцэг өөрийн цахим хуудсанд "Хүмүүс тамирчин болгон авдаг гэж боддог юм болов уу ? Бүх тамирчид авдаггүй юм шүү дээ. Зөвхөн олимпийн төрлийн спортын дэлхийн аварга, олимпоос медаль авсан хүмүүс л авдаг. Тэр амжилтанд хүрэх гэж 10-20 жилийг зөвхөн бэлтгэлд зориулдаг. Тамирчин болоод хажуугаар нь сураад явна гэвэл өндөр зэрэглэлийн тамирчин хэзээ ч болж чадахгүй. Амьдрал, боловсрол, ар гэр гээд бүх юм л хаягддаг. Дэлхийд хамгийн их хүн үзэж сонирхож улсаа бусдад таниулах боломж чинь спорт шүү дээ.
Олон тамирчин карьераа дуусгаад хэн ч биш болж л байсан. Бас олон тамирчин амьдралын баталгаанд хүрэх гэж илүү их хичээж байхыг харсан. Манайд гадны улс орон шиг тамирчдаа (үндэсний бөхөөс бусад) дэмждэг байгууллага цөөхөн байдаг. Сүүлд нь Монгол улсын хэмжээнд энэ шагналыг авдаг 50 гаран хүн л байдаг юм шүү. Тэрнээс бүх тамирчин авдаггүй. Баярлалаа." хэмээн бичжээ.
