Манай улсын Биеийн тамир, спортын улсын хороо ОХУ-ын Уран гулгалтын холбоотой хамтран уран гулгалтын үзүүлэн тоглолтыг энэ амралтын өдрүүдэд "Мөсөн Өргөө"-д зохион байгуулах гэж байна.
ОХУ-аас нийт 32 хүний баг бүрэлдэхүүн Улаанбаатар хотод өчигдөр ирсэн бөгөөд тус үзүүлэн тоглолтод үндэсний шигшээ багийн 17 тамирчин зургаан дасгалжуулагч оролцох юм.
Баг тамирчид үзүүлэн тоглолтын бэлтгэлээ "Мөсөн Өргөө"-д өнөөдөр хангасан бөгөөд 17:30 цагт хэвлэлийн хурал зохион байгуулж Монголд ирсэн сэтгэгдэл болон үзүүлбэрийнхээ талаар ярив.
Энэ үеэр багийн төрлийн Олимп, Европын аварга Камила Валиева Монголд ирсэн сэтгэгдлээ хуваалцлаа.
Тэрбээр "Өчигдөр орой ирээд хотын төвд буудалласан. Манай зочид буудал хотын төвтэй ойрхон байсан учраас Сүхбаатарын талбайгаар хэсэгхэн зугаалах боломж гарсан. Анх удаа Монголд ирлээ. Одоогоор их зүйл харж чадаагүй байгаа ч гэсэн тайван сайхан сэтгэгдэлтэй байна.
Магадгүй энд байх хугацаандаа илүү олон зүйлийг харах байх. Ирээдүйд дахиж Монголд ирэх байх гэж найдаж байна. Бид үзэгчдэдээ зориулаад Монголын нэг дуучны ая дээр тусгай үзүүлбэр бэлдсэн" хэмээн ярилаа.
"МАНАЙ БҮХ ТАМИРЧИН ОЛОН УЛСЫН ТЭМЦЭЭН УРАЛДААНД ТҮРҮҮЛСЭН ҮЗҮҮЛБЭРҮҮДЭЭ ҮЗҮҮЛЭХ БОЛНО"
Маргааш үзүүлэх тамирчдын үзүүлбэрийн талаар ОХУ-ын Уран гулгагчдын холбооны Ерөнхийлөгч Антон Сихарулидзегээс асуухад "Манай бүх тамирчин олон улсын тэмцээн уралдаанд түрүүлсэн үзүүлбэрүүдээ үзүүлэх болно. Уран гулгалтын хүнд элементүүдийг тамирчид маань хийх байх" хэмээн тайлбарлав.
