Чойжин Ламын сүм музей үзэсгэлэнгийн шинэ барилгатай болно. Тодруулбал, 54х12 хэмжээтэй үзэсгэлэнгийн шинэ цогцолбор барихаар төлөвлөжээ. Тухайн шинэ барилга 6 хүртэлх метрийн өндөр байх бөгөөд 2.0 га талбайг хамрах юм байна. Энэхүү шинэ барилгын зураг төслийн захиалгыг Чойжин ламын сүм музей болон салбарын яам захиалж 2020 оны 12 сард батлуулсан аж. Энд музейн ажилчид байрлахаас гадна сувинерийн худалдаа, үзэсгэлэн зэргийг байршуулахаар төлөвлөөд буй.
Cүмийн барилгын одоогийн түүхэн цогцолборыг Төрийн Чойжин Лувсанхайдавын шашин номын үйлд зориулан 1904-1908 оны хооронд Их хүрээний нэрт уран барилгач Омбо тэргүүтэй 300 гаруй эрдэм билигт урчууд бүтээн байгуулжээ.
БНМАУ-ын Бага хурлын 1941 оны 11 дүгээр сарын 13-ны өдрийн шийдвэрээр Чойжин ламын сүмийг нэгдүгээр зэргийн хамгаалалтад авч, улмаар 1942 оноос эхлэн дотоод, гадаадын томоохон зочид төлөөлөгчдөд тусгай зөвшөөрлөөр үзүүлэх шашны музей болгосон. Монгол Улсын Гэгээрлийн сайдын 2000 оны нэгдүгээр сарын 05-ны өдрийн 293/7 тоот тушаалаар шашны түүхийн музейн харьяаллаас гарч бие даасан байгууллага болон өнөөг хүртэл үйл ажиллагаагаа өргөжүүлэн ажиллаж байгаа юм.
