Төв аймгийн тариаланчид эх орныхоо хөрсний үржил шимийг хүртэж, бүтэн жилийн нөр их хөдөлмөр зүтгэл, хөлс хүчээ шингээн байж хураан авсан арвин ургацынхаа баярыг тэмдэглэлээ.
“Алтан намар-2026” ёслол, хүндэтгэлийн үйл ажиллагаанд Хүнс, хөдөө аж ахуй, хөнгөн үйлдвэрийн яамны Бодлого, төлөвлөлтийн газрын дарга Ц.Болорчулуун тэргүүтэй албаныхан, Төв аймгийн болон сумын удирдлагууд, төлөөлөл, тариаланч, ногоочин, агрономч, механикжуулагчид, хөдөө аж ахуйн салбарын үе үеийн ажилтан, албан хаагчид оролцлоо.
2026 онд аймгийн хэмжээнд 140.042 га талбайд тариалалт хийж, 490.783 тонн ургац хураан авч, нийт ургац болон үр тариа, төмс, таримал тэжээлийн үйлдвэрлэлээрээ улсдаа тэргүүлж, сүүлийн 40 жилд аваагүй өндөр ургац хураан авч, газар тариалангийн салбартаа түүхэн амжилт гаргалаа.
Улсын хэмжээнд хураан авсан үр тарианы 23 хувь, төмсний 56 хувь, хүнсний ногооны 18 хувь, тосны ургамлын 15 хувь, таримал тэжээлийн 55 хувийг Төв аймаг дангаараа тариалж, эх орныхоо хүнсний салбарын хөгжилд үнэт хувь нэмрээ орууллаа.
Энэ бол газар тариалангийн салбарт бие сэтгэл, оюун бодол, хүч хөдөлмөрөө зориулсан 4000 гаруй тариаланч, ногоочин, агрономч, механикжуулагчдын нөр их хөдөлмөр, төрийн бодлого шийдвэрийн уялдаа холбоо, авч хэрэгжүүлж буй шат дараалсан олон ажлуудын хамтын үр дүн юм.
