Их Британийн Батлан хамгаалахын сайд Бен Уоллес Украинд хэд хэдэн нисдэг тэрэг өгөхөө мэдэгдэв. Энэ нь Лондонгоос Киев рүү нисгэгчтэй онгоцыг анх удаа нийлүүлж байгаа явдал юм.
Мэдэгдэж буйгаар өмнө нь Хатан хааны агаарын цэргийн хүчний үйлчилгээнд байсан WS-61 Sea King гурван нисдэг тэргийг шилжүүлэх тухай ярьж байгаа бөгөөд нэгийг нь Украинд нийлүүлээд байна.
Энэ бол нисдэг тэрэгний хуучин загвар бөгөөд тэдгээрийг үйлдвэрлэхээ больсон юм. Далайн хаад/Sea King/-ыг Фолкландын дайн, Персийн булангийн дайн, Балкан, Иракийн дайны үед ашиглаж байжээ. Хамгийн сүүлд ийм төрлийн нисдэг тэрэг 2018 онд ашиглалтаас гарсан юм.
Украин эдгээр нисдэг тэргүүдийг яг хэрхэн ашиглах нь одоогоор тодорхойгүй байна. Нийлүүлэхээр төлөвлөж буй нисдэг тэргүүдийг ихэвчлэн эрэн хайх, аврах, эмнэлгийн тээврийн үйл ажиллагаанд зориулагдсан байдаг. Таймс сонинд тэмдэглэснээр мөн тагнуулын ажилд ч тохиромжтой аж.
Сүүлийн зургаан долоо хоногт Хатан хааны тэнгисийн цэргийн сургагч багш нар Украины цэргийн багийнханд эдгээр машиныг хэрхэн ажиллуулах, засвар үйлчилгээ хийх талаар сургаж дадлагажуулж байна.
BBC-ийн батлан хамгаалахын сурвалжлагч Жонатан Билийн онцолж байгаагаар барууны цөөхөн орон Украинд нисгэгчтэй онгоц нийлүүлсэн байна. Украины эрх баригчид барууны холбоотнуудаас сөнөөгч онгоц эсвэл довтолгооны нисдэг тэрэг өгөхийг гуйсаар байгаа ч өнөөг хүртэл эдгээр хүсэлтэд хариу өгөөгүй байна.
Их Британи Украинд нисдэг тэрэгнүүдээс гадна нэмэлт арван мянган их бууны сум өгнө гэж Бен Уоллес мэдэгдэв. Сайдын хэлснээр, тэд Украинд саяхан чөлөөлөгдсөн газар нутгаа хамгаалахад туслах юм байна.
Их Британи бол АНУ-ын дараа Украинд цэргийн тусламж үзүүлж буй хоёр дахь том хандивлагч юм. Тус улсын Ерөнхий сайд өнгөрсөн амралтын өдрүүдэд Киевт айлчилж, Украины Зэвсэгт хүчинд дэмжлэг үзүүлэхэд зориулан дахин 50 сая фунт стерлингийн тусламж үзүүлэхээ амлав. Тухайлбал, Ираны нисгэгчгүй онгоц /дрон/-ыг устгах зенитийн 125 төхөөрөмж болон тоног төхөөрөмж нийлүүлэх юм.
Энэ сарын эхээр Лондон мөн Украинд дахин 1000 зенитийн пуужин нийлүүлэхээ мэдэгдээд байгаа юм.
Эх сурвалж: ВВС