Умард Солонгосын удирдагч Ким Жон Ун ОХУ-ыг зорьсон бөгөөд Владивосток хот хүртэл 1180 км замыг галт тэргээр туулна. Түүний Тэянхо буюу нараар нэрлэгдсэн галт тэрэг сум нэвтэрдэггүй хүнд техникээр хуяглаж, өвч тоноглогдсон тул бусад галт тэргээс хүнд, удаан явдаг ажээ. Тиймээс Ким Владисвостокт ирэх хүртлээ бүтэн хоног шахуу хугацааг тансаг зэрэглэлийн хуягт галт тэргэндээ өнгөрүүлэх юм байна. Кимийн галт тэрэг цагт ойролцоогоор 50 км замыг туулдаг аж. Аяллын туршид франц дарс, цэвэр хавч, тансаг зэрэглэлийн зоогоор үйлчилдэг байна.
Хол замыг хуягт галт тэргээр туулдаг уламжлал Ким Жон Уны өвөө Умард Солонгос улсыг үүсгэн байгуулагч Ким Ир Сений үед тавигджээ. Ким Ир Сен зүүн Европ, Вьетнам руу аялахдаа хувийнхаа галт тэргээр зорчиж байжээ. Өнөөгийн удирдагчийн эцэг Ким Жон Ир нисэхээс айдаг байсан тулд 1994-2011 он хүртэл зөвхөн галт тэргээр аялдаг байв. Тэр 2001 онд Москва орж Ерөнхийлөгч Владимир Путинтэй уулзахад 10 хоногийн хугацаа зарцуулжээ. Уг аялалд гар бие оролцсон Оросын цэргийн командлагч Константин Пуликовский Умард Солонгосын удирдагчийн галт тэргэнд орос, хятад, солонгос, япон, франц хоолноос дуртайгаа захиалах боломжтой байсан тухай дурсамжаасаа хуваалцжээ. Мөн Парисаас дээд зэрэглэлийн Bordeaux, Burgundy дарснуудыг захиалан авчирсан байв. Түүний хэлснээр Ерөнхийлөгч Путины хувийн галт тэрэг ч Ким Жон Ирийн галт тэрэг шиг тансаг, тухтай биш гэжээ. Өмнөд Солонгосын өдөр тутмын Чосун Илбо хэвлэлд 2009 онд нийтэлж байснаар Кимийн гэр бүлийн галт тэрэг 90 чингэлэгтэй ба шар зураастай ногоон чингэлгүүд нь уулзалтын өрөөг илтгэнэ гэжээ. Түүнчлэн унтлагын өрөө, үзлэгийн танхимууд, хиймэл дагуулын гар утас, хавтгай дэлгэцтэй телевизүүдээр тоноглогдсон тухай бичжээ.
Ким Жон Ун эцэгтэй адил нисэхээс айдаггүй боловч 2019 онд Оросын алс дорнодыг зорихдоо галт тэргээр зорчсон юм. Эцгийгээ нас барсны дараа анхны олон улсын нислэгээ 2018 онд Хятадын Далянь хотод удирдагч Ши Жиньпинтэй уулзахдаа хийжээ. Ким Жон Унд хуягт галт тэргээс гадна Chammae-1 хувийн нисэх онгоц, 1.8 сая ам.долларын үнэтэй 2010 онд үйлдвэрлэгдсэн Mercedes-Benz S-Class машин, дарвуулт хөлөг байдаг ч хуягт галт тэргийг Владивостокт хийх айлчлалдаа хамгийн тохиромжтой хүлгээр сонгожээ.