- Путиныг ОУЭШ-ээс баривчлах шийдвэр гаргасан
- Улмаар гишүүн орнууд улсад нь ОХУ-ын Ерөнхийлөгч нэвтэрвэл баривчлах үүрэгтэй болов
- Ирэх жилийн "G20" уулзалтыг Бразилд зохион байгуулна
“G20” бүлгийн уулзалт өнгөрсөн амралтын өдрүүдээр Энэтхэг улсад болж өндөрлөлөө. Харин ирэх жилийн уулзалтыг Бразил улс зохион байгуулах юм.
Уулзалтын үеэр Бразилын Ерөнхийлөгч Луис Инацио Лула да Силва ирэх жил ОХУ-ын Ерөнхийлөгч Владимир Путиныг урих бөгөөд түүнийг Бразилд очвол баривчлахгүй гэдгээ мэдэгджээ.
Тодруулбал энэ оны гуравдугаар сард Гааг дахь Олон улсын эрүүгийн шүүхээс ОХУ-ын Ерөнхийлөгч Владимир Путиныг Украин хүүхдүүдийг эх орноос нь албадан гаргасан хэрэгт буруутгаж, баривчлах шийдвэр гаргасан.
Улмаар ОУЭШ-ийн гишүүн орнууд улсад нь Оросын Ерөнхийлөгч хөл тавивал баривчлах үүрэгтэй болсон юм. Үүний улмаас өнгөрсөн сард болсон БРИКС-ийн орнуудын чуулга уулзалтад Путин оролцоогүй.
Мөн сая болж өнгөрсөн “Хорийн бүлэг”-ийн уулзалтад Путин оролцоогүй бөгөөд Бразилын Ерөнхийлөгч “Путин Бразил улсад чөлөөтэй нэвтэрч болно. Би Ерөнхийлөгч байгаа цагт Путин Бразилд ирвэл түүнийг баривчлахгүй” хэмээн хэлжээ.
Тэргүүлэгч эдийн засагтай, аж үйлдвэржсэн орнуудын удирдагчид уулзалтаар эдийн засаг, хүнсний аюулгүй байдал, уур амьсгал, хүрээлэн буй орчин болон Орос-Украины дайны асуудлаар хэлэлцэж, Африкийн Холбоог шинэ гишүүнээр элсүүлсэн.
Эх сурвалж: Алжазийра