Баасан гарагт Умард Солонгос тактикийн цөмийн цохилт өгөх чадвартай шумбагч хөлөг онгоцтой болсноо зарласан юм.
Нээлтийн ёслолын ажиллагаанд оролцсон тус улсын удирдагч Ким Жон Ун маш их баяр хөөртэй байгааг Пёньяны төв хэвлэлүүд харуулжээ.
Цайвар шаргал өнгийн хослол, нарны бүрх малгай өмссөн Ким энэ үеэр нүүр дүүрэн мишээж, сэтгэл хөөрлөө барьж дийлэхгүй байгаа нь харагдсан юм. Тэр нэг удаа бүр тэнгисийн флотын офицерынхоо малгайг шүүрэн өмсөж, тойрон хүрээлэгсэдээ хөгжөөж байв.https://www.youtube.com/embed/gzMODR9lXE0?rel=0
Умардын хэвлэлүүдийн мэдээлснээр шинэ хөлөг нь Солонгосын хойг болон Японы арлуудыг тусгаарласан тэнгисийн усанд эргүүлийн үүрэг гүйцэтгэх юм байна.
Хэрвээ шинэ шумбагч хөлөг найдвартай ажиллаж эхэлбэл энэ нь Умард Солонгосын түүхэнд анхных болох юм.
Гэхдээ мэргэжилтнүүд уг шумбагч сурталчилж байгаа шигээ ажиллаж чадна гэдэгт эргэлзэж байна.
Шинэ шумбагчийг 1960-аад онд анх зохион бүтээсэн Зөвлөлтийн үеийн Ромео ангиллын платформыг өөрчлөн засварлах замаар бүтээсэн байж болзошгүй гэж тэд дүгнэжээ. Умард Солонгос нь 1970-аад оны үед уг платформыг Хятадаас худалдан авч байжээ.
“Платформынхоо хувьд энэ нь ерөнхий ажиллагааны сул тал ихтэй, боломж нэлээд хязгаарлагдмал байх ёстой” гэж Олон Улсын Стратеги Судлалын Хүрээлэнгийн судлаач Жозеф Дэмпси BBC сувагт ярьсан байна.
Эх сурвалж: Reuters