Өнгөрөгч долоо хоногт АНУ-ын Монтана муж TikTok платформд хориг тавьж, тус платформыг хориглосон АНУ-ын анхны муж болсон билээ. Тэгвэл тэдний хоригийг эсэргүүцсэн TikTok платформ даваа гарагт шүүхэд гомдол гаргажээ.
Тэдний мэдэгдсэнээр TikTok платформыг муж даяар хориглох нь үг хэлэх үндсэн эрхтэй зөрчилдөж байна гэсэн юм. Тийнхүү тэд дүүргийн шүүхэд хандсан бөгөөд хууль бус хоригийг хүчингүй болгохоор оролдож байгаа ажээ.
Хэрэв тэд тогтоосон хоригийг хүчингүй болгож чадахгүй аваас хориг ирэх оны нэгдүгээр сараас хэрэгжиж эхлэх юм. Улмаар хориг хэрэгжвэл Монтана мужийн нутаг дэвсгэрээс App Store, Google Play зэрэгт хандахад TikTok аппликейшныг татах боломжгүй болох гэнэ. Харин ухаалаг утас дээрээ TikTok аппликейшныг аль хэдийнээ татсан бол хэрэглэж болох юм. Монтана мужийн зүгээс аппликейшныг татахыг хориглосон ч хэрэглэхийг хориглоогүй байна.
Эх сурвалж: BBC