Холбооны Тагнуулын Албаны ерөнхийлөгч Бруно Калын хэлснээр одоогийн байдлаар Норд Стрим хийн шугамыг хэн дэлбэлж, хорлон сүйтгэх ажиллагаа явуулсныг нэрлэж чадах нэг ч тагнуулын алба үгүй гэжээ.
Түүний мэдэгдсэнээр, “Одоогоор дэлхийн аль ч улс, аль ч тагнуулын агентлаг үүнийг хэн нэгэнтэй холбон тайлбарлаж чадахгүй байна. Энэ байдал магадгүй өөрчлөгдөх байх. Мөрдөн шалгах ажиллагаанд хэд хэдэн мэдэгдэхүйц амжилт гарсан.
Хорлон сүйтгэх ажиллагаа явагдсан газар нь далайн ёроолд учир мөрдөн шалгах ажиллагааг явуулахад чамгүй хүндрэлтэй байгаа. Мөрдөн шалгах ажиллагааг олон аргаар явуулж байгаа бөгөөд үүний дүнд зарим нэг таамаглал илүү батлагдаж, зарим таамаглал няцаагдах ч боломжтойг үгүйсгэж болохгүй” гэсэн юм.
Бруно Калын хувьд ийн мэдэгдэх болсон шалтгаан нь ням гарагт Германы Зюддойче Цайтунг өдөр тутмын сониноос Норд Стрим хийн шугамын дэлбэрэлтэд дор хаяж хоёр украин буруутай гэж мэдээлсэнтэй холбоотой ажээ.
Эх сурвалж: ТАСС