Дэлхийн үнэт цаасны хяналтын байгууллага болох Олон улсын үнэт цаасны хороо (IOSCO) криптовалют болон дижитал зах зээлд зориулсан дэлхийн анхны нэгдсэн зохицуулалтыг стандартчилан гаргахаар болсон тухай Ройтерс агентлаг орон нутгийн цагаар 23-ны өдөр мэдээлэв.
Тус байгууллагын зүгээс гаргахаар төлөвлөж дэлхийн нэгдсэн зохицуулалт нь ашиг сонирхлын зөрчил, зах зээл дэх хууран мэхлэх үйл ажиллагаа, хил дамнасан хамтын ажиллагаа, криптовалют буюу виртуал хөрөнгийн хадгалалт, үйл ажиллагааны эрсдэл, жижиглэнгийн худалдан авагчдын асуудлыг шийдвэрлэхэд чиглэгдэж буй аж.
Эдгээр зохицуулалтуудаас 18 нь криптовалютын арилжаатай холбоотой төрөл бүрийн ашиг сонирхлын зөрчлөөс урьдчилан сэргийлэх зорилгоор зах зээлд эртнээс оршин тогтнож ирсэн хамгаалалтын арга хэмжээг хэрэгжүүлэхээр төлөвлөж буй талаараа Олон улсын үнэт цаасны хороо онцлон тэмдэглэсэн байна.
Тус байгууллага нь энэ оны эцэс гэхэд холбогдох стандартыг боловсруулж дуусгахаар төлөвлөж байгаа бөгөөд АНУ-ын Үнэт цаас, биржийн хороо, БНСУ-ын Санхүүгийн хяналтын алба зэрэг дэлхийн 130 гишүүн улс орнууд уг стандартын дагуу тус салбартай холбоотой асуудлыг зохицуулах боломжтой болох гэнэ. Үүний тулд Олон улсын үнэт цаасны хороо улс орнуудын саналыг цуглуулж байгаа аж.
Эх сурвалж: MBC