Залуужих хүсэлдээ автсандаа юу аль эсвэл хөгшрөлтийн эсрэг судалгаанд зориулагдсан уу?
Хэрхэн залуужих талаар байнга судалгаа хийж байдаг 40 гаруй насны америк саятан эр энэ удаад 17 настай хүүгийнхээ цусны сийвэнг өөртөө хийлгэжээ. Тэрээр судалгааны зорилгоор хүүгийнхээ цусны сийвэнг авч хийлгүүлсэн хэмээн мэдэгдсэн ч зарим хэвлэл мэдээллийн байгууллагууд эл үйлдлийг нь "шинжлэх ухааны ямар ч үндэслэлгүй", "жигшүүртэй" гэх зэргээр шүүмжилснийг Bloomberg агентлаг орон нутгийн цагаар 22-ны өдөр мэдээлэв.
Маргаан дагуулсан энэхүү үйл явдлын эзэн бол АНУ-ын мэдээллийн технологийн бизнесмэн өдгөө 45 настай Брайан Жонсон бөгөөд тэрээр өөрийн биологийн насаа 18 болгох “мөрөөдөл"-д автсан нэгэн гэж хэлж болох юм. Тэрээр сүүлийн саруудад хэд хэдэн удаа нэрээ нууцалсан залуу донороос цусны сийвэн сэлбүүлж байсан ба өнгөрсөн сард өөрийн хүү 17 настай Телмазегийн цусны сийвэнг ялгуулан авч өартөө хийлгэжээ.
Тэрээр нас биед хүрээгүй өөрийн хүү Телмазег Техас мужийн Даллас хотын эмнэлэгт дагуулан очиж хэдэн цагийн турш болсны эцэст бүтэн нэг литр цус авсан байна.
Business Insider сайтын зүгээс энэ хэмжээний цус нь Телмазегийн насныханы хувьд нийт цусных нь тавны нэг орчим хэмжээ хэмээн тооцоолжээ.
Гэвч мөн өдөр аавдаа өөрийн цусыг хандивласан хүн зөвхөн Телмазе байсангүй. Тодруулбал Брайан ч мөн цусаа өгч, түүнээсээ сийвэнг нь ялган гаргуулаад 70 настай өөрийн аавдаа тариулсан аж.
Брайан дижитал төлбөрийн Braintree компанийг байгуулсныхаа дараа компаниа зарж асар их хөрөнгөжсөн юм. Тэрээр одоогоор тархи-компьютерийн чиглэлээр үйл ажиллагаа явуулдаг Interface Venture компанийг тэргүүлдэг.
Брайан хөгшрөлтийг удаашруулах, бүр цаашлаад хүний насыг ухраах аргыг олохын тулд жил бүр олон сая ам.долларын хөрөнгө оруулалт хийдэг юм. Тэрээр үүнтэй холбоотойгоор хоолны дэглэм, нойр, дасгал хөдөлгөөн зэрэг эрүүл мэндийн эмчилгээ, оношилгоонд өөрийн биеэр хамрагддаг ба энэхүү үйл ажиллагаагаа “Project Blueprint” нэрийн дор хэд хэдэн эмч нартай хамтран олон нийтэд сурталчилдаг байна.
Цусан дахь сийвэнг ялгаж аван тарих нь анагаах ухааны салбарт элэгний өвчин, түлэгдэлт, цусны өвчин зэрэг олон өвчний үед хэрэглэгддэг эмчилгээ боловч Дэлхийн эрүүл мэндийн байгууллагын зүгээс (ДЭМБ) 2021 онд энэхүү аргыг хэрэглэхийг зөвлөхөө больсон юм.
Олон нийтийн зүгээс түүний залуужуулах аргыг идэвхийлэн эрэлхийлж байгааг шүүмжлэх хэсэг ч байдаг. Өмнө нь залуужуулах эмчилгээний туршилт нэрийдлээр идэр залуу насны хулгана болон хөгшин хулганы цусыг харилцан сэлбэх туршилт явагдаж байсан ч яг энэ чиглэлээр хүний биед хийсэн туршилт судалгаа тун ховор байдаг аж.
АНУ-ын Лос-Анжелес хотын нэгэн эмнэлгийн биохимич Чарльз Бреннер уг үйл явдлын талаар сэтгэгдлээ хэлэхдээ “Хүн төрөлхтний эрүүл мэндтэй холбоотой асуудалд тохирсон эмчилгээ гэж үзэх хангалттай мэдлэг, туршлага бидэнд алга. Би үүнийг жигшүүртэйн дээр нотлох баримт хомс, харьцангуй аюултай зүйл гэж үзэж байна” хэмээжээ.
Гэвч Брайаны талын эмч, эмнэлгийн ажилтнууд энэхүү процедур нь тархины үйл ажиллагаа, ой тогтоолт муудах зэрэгт эерэгээр нөлөөлөх боломжтой бөгөөд Паркинсоны өвчин эсвэл Альцгеймерээс урьдчилан сэргийлнэ гэв.
Харин Брайан "Бид юуны түрүүнд баримт нотолгоог чухалчилж авч үздэг. Зөвхөн сэтгэл хөдлөл дээр тулгуурлан ямар нэгэн шийдвэр гаргадаг хүмүүс бид биш” хэмээн өөрийн байр сууриа мөн илэрхийлжээ.
Bloomberg News агентлагийн зүгээс Брайаны уг үйлдлийг “цус сорогчоос ялгарахгүй гутамшигтай явдал” хэмээн шүүмжилсэн юм.
Баян чинээлэг хүмүүс мөнгө шаардлагатай залуу хүмүүсийн цусны сийвэнг авч өөртөө хийлгэдэг нь тийм ч гайхах асуудал биш болоод байгаа бөгөөд энэхүү процедур нь 5500 ам.долларын үнэтэй байдаг бол сийвэнгийн доноруудын хувьд ихэвчлэн 100 ам.долларын бэлгийн карт авдаг байна.
Эх сурвалж: Maeil