ОХУ-ын Белгород мужид нэвтэрсэн хорлон сүйтгэгчдийг устгасан гэж Оросын Батлан хамгаалах яам мэдэгдэв.
Тус яам өчигдөр Оросын нутаг дэвсгэрт нэвтэрсэн Украины 70 үндсэрхэг үзэлтэнийг хөнөөсөн тухай мэдээлсэн байна.
"Үндсэрхэг үзэлтнүүдийн үлдэгдлийг Украины нутаг дэвсгэрт буцаан хөөж, тулааны үеэр Украины 70 гаруй алан хядагч, байлдааны дөрвөн хуягт машин, таван пикапыг устгасан" гэж Батлан хамгаалах яамны мэдээнд дурджээ.
Энэ нь даваа гарагаас хойш ОХУ-ын Белгород мужид үргэлжилж байгаа байлдааны ажиллагааны талаар Батлан хамгаалах яамны өгч буй анхны мэдэгдэл юм.
Дашрамд тодотгоход Белгород мужид болж буй хорлон сүйтгэх ажиллагааны хариуцлагыг Украин хүлээгээгүй байна. Үүнтэй холбоотойгоор Украины Батлан хамгаалахын сайдын зөвлөх Юрий Сак өмнөх өдөр нь Оросын иргэд Белгород мужид болсон хорлон сүйтгэх ажиллагаанд оролцож байгаа талаар ВВС-д ярьжээ.
Белгород мужид болсон халдлагын улмаас 12 хүн шархадсан; 9 суурингийн оршин суугчдыг нүүлгэн шилжүүлсэн гэж мужийн захирагч мэдэгджээ.
"Грайворон хотын дүүргийн суурингууд миномет болон их бууны галд өртөж, мөн нисгэгчгүй онгоцнуудын довтолгоонд өртсөн гэжээ. Мөн хувийн 29 байшин, гурван машин эвдэрч 14 сууринд цахилгаан тасарсан байна.
Эх сурвалж: ВВС