Жирэмсэн эмэгтэйчүүд хэт авиан шинжилгээгээр хэвлий дэх ургийнхаа өсөлт хөгжлийг хянадгийг хүн бүр мэддэг билээ. Хэвлийдээ бүрэлдэн өсөж торниж буй бяцхан амийг харна гэдэг ээж аавын хувьд маш их баяр жаргалтай үе байдаг.
Тэгвэл ургийн нуруу болон биеийн ерөнхий хөгжилд асуудал байгаа эсэхийг тодруулахдаа сүүлийн үед МRI шинжилгээг илүүд үздэг болоод байгаа юм. MRI буюу соронзон резонансын дүрслэл нь хэт авиан шинжилгээтэй харьцуулахад ургийн биеийн ерөнхий хөгжлийг илүү нарийн тодорхойлох боломжийг олгодог аж. Гэвч MRI шинжилгээгээр авсан ургийн зураг эцэг эхчүүдийг бараг цочролд оруулдаг гэхэд хэтрүүлсэн болохгүй.
Орон нутгийн цагаар 16-ны өдөр Red Bible сайт хөл хүнд эмэгтэйн MRI шинжилгээний зураг дээрх ургийн дүрсийг олон нийтэд хүргэсэн байна.
Энэхүү зураг нь бүр 2021 онд авсан зураг бөгөөд тус зурган дээрх ураг нүдээ бүлтийлгэн харангаа бас инээмсэглэсэн байгаа нь харагдана.
Гэтэл уг зургийг харсан интернет хэрэглэгчид “Ямар цочирдмоор төрхтэй юм бэ”, “Энэ яг эхийнхээ хэвлийд бүрэлдэж буй хүүхдийн зураг мөн үү?", "Яг л чөтгөр инээж байгаа юм шиг байна", "Харь гаригийн хүн шиг харагдаж байна" гэх мэтээр гайхан хариулсан нь харагдах аж.
Үйл явдлын үнэн мөн эсэхийг нягталдаг Snopes сайтын зүгээс Висконсины Их Сургуулийн докторант, хичээлийн туслах ажилтан Жэйсон Мудитэй холбогдож, уг зураг нь эхийнхээ хэвлийд буй ургийн MRI шинжилгээний зураг мөн болохыг баталсан байна.
"Ургийг эвгүй дүр төрхтэй харагдуулах нь MRI шинжилгээний хамгийн сайн хийдэг зүйл. MRI нь биед буй зөөлөн эдийг хялбархан ялгах боломжийг олгодог” гэж Муди цохон тэмдэглэжээ.
"MRI шинжилгээний хамгийн гол онцлог нь нүд, тархи, хамар болон нүүрний бусад хэсгийн хоорондох холбоос зөөлөн эдийг маш нарийн харуулдаг явдал юм” хэмээн тэрээр нэмж өгүүлсэн байна. Үүний улмаас ч ургийн царай төрх эвгүй харагддаг ажээ.
Эх сурвалж: Maeil