Төрийн ордны Чингис хааны их танхимд ахмадуудын асрамжийн газар барих төсөл танилцуулах уулзалт 2022.05.13 нд 12:00 цагт болохоор болжээ. Иргэн Г.Хажидмаагийн санаачлагаар Дэлхийн стандарт шаардлага хангасан Ахмадуудын асрамжийн газар барих төсөл хэрэгжүүлэхийн тулд үе үеийн тэргүүн хадагтай нар, УИХ-ийн гишүүнээр ажиллаж байсан эмэгтэйчүүдийг энэхүү уулзалтдаа урьжээ.
УИХ-д ажиллаж байсан болон ажиллаж байгаа эмэгтэйчүүд энэхүү ажилд онцгой анхаарал тавин хөөцөлдөөд бүтээгээд өгвөл энэ насных нь буян болох бизээ.
Учир нь тэд хэдийгээр хууль батлалцаж суудаг ч гэсэн тодорхой гарт баригдаж, нүдэнд үзэгдэх ажил хийхгүй байсаар 4 жилийг өнгөрөөдөг нь үнэн. Зөөлөн суудлаас буухдаа ч "Хатан эх" "Боов" "Авилгач" гэсэн нь нэр хочноос өөр зүйлтэй үлддэггүй.
Тиймээс л ард түмэн тэднийг хэрэгжихгшүй баахан хууль баталж байхаар , өтөл хөгшид, үр хойч болсон хүүхэд багачууддаа ямар нэгэн зүйл бүтээгээд өгөөсэй хэмээн хүлээдэг нь нууц биш. Өдгөө Монгол Улсад 40 мянган ахмад харж хандах хүнгүй амьдарч байна. Монголд Батсүмбэрийн ахмадын асрамжын газар үйл ажиллагаагаа явуулдаг ч 160 ахмадууд л байх боломжтой.
Батсүмбэрийн ахмадын асрамж л гэхэд 97 жилийн түүхтэй. тус газар Эрүүл мэндийн яамд хамааралгүй тул эрүүл мэндийн үйлчилгээ үзүүлэх тусгай зөвшөөрөлгүй. гэвч цөөхөн хэдэн эмч нар нь 160 гаруй асруулагч, хөгжлийн бэрхшээлтэй иргэнд эрүүл мэнд, сувилгааны үйлчилгээ үзүүлдэг. Монгол улс Үндсэн хуулиндаа "Амьд явах эрхтэй"гэж заасан ч хүүхэд хөгшиддөө маш хатуу, харгис хандаж байгаа билээ.
Тиймээс л Дэлхийн стандарт шаардлага хангасан Ахмадуудын асрамжийн газар барих санаачлагыг үе үеийн тэргүүн хатагтай нарыг дэмжинэ гэдэгт найдаж байна.Иргэн Г.Хажидмаа болон "Буянт буурлууд" ТББ Хотын дарга болон Нийслэлийн газрын албанаас бүтэн жил газар гуйсан боловч өгсөнгүй. Байгаль орчны яамны сайдад хүсэлт өгөөд уулзах цаг товлосон гэнэ.
Буяны үйлсэд ч төр захиргааны байгууллага хахууль өгөх, нэг бол баян, эсвэл томоохон албан тушаалтан, танил тал байхгүй л бол хөдлөхгүй болсон нийгэмд Эхчүүд, эмэгтэйчүүд хүчээ нэгтгэж чадвал юу бүтээж чадах билээ.
Өчигдөрхөн Монгол улсын ерөнхийлөгч У.Хүрэлсүх өмнөх 5 ерөнхийлөгч нартайгаа хамтран ажиллах, эв нэгдэлтэй байх зэрэг асуудлаар санал солилцож уулзсан. Тэгвэл Үр хүүхэд, аав ээж, гэр бүлийнхээ төлөө юуг ч зориглон хийж чадах Эхчүүд эмэгтэйчүүд нэгдэж, өмнө үедээ Эх орныхоо бүтээн байгуулалтын төлөө насаараа зүтгэсэн ахмадуудадаа Асрамжийн газар байгуулж өгөхийн төлөө нэгдэх цаг болжээ. "Хүний хамгийн том албан тушаал бол ХҮН байх явдал" хэмээн агуу соён гэгээрүүлэгч Л.Түдэв гуай нэгэнтээ айлдсан билээ. Тиймээс үе үеийн тэргүүн хадагтай нар, УИХ-ийн гишүүнээр ажиллаж байсан, ажиллаж байгаа эмэгтэйчүүдийг энэхүү уулзалтад хамгийн түрүүнд хүрэлцэн ирж нийгмээ манлайлахыг л харах л үлдээд байна.
