Нийгмийн бодлогын байнгын хорооны хуралдааны үеэр УИХ-ын гишүүн П.Анужин Капитал банкнаас хураасан орон сууцнуудыг даатгалын сангийн ажилтнуудад өгсөн эсэх талаар ЭМДЕГ-ын дарга Л.Бямбасүрэнгээс тодрууллаа.
Энэ асуултад тэрбээр дараах хариултыг өгсөн юм. "Капитал банкны өрөнд хэд хэдэн объектыг хүлээн авсан байгаа. Үүнд ЭМД-ын Үндэсний зөвлөлийн 2021 оны 11 дүгээр тогтоолоор баталсан ЭМД-ын сангийн авлаганд "Үл хөдлөх хөрөнгийг хүлээн авах, хадгалах, хамгаалах, ашиглах, түрээслүүлэх, худалдан борлуулах" журам батлагдсан. Энэ журмын зургаадугаар зүйлийн 6.37 дахь хэсэгт "ЭМДЕГ нь Сангийн яаманд тооцон авсан орон сууцыг ЭМД-ын байгууллагын албан хаагчид болон иргэн, хуулийн этгээдэд банкны зээлээр, мөн бэлэн мөнгөөр худалдан борлуулах ажлыг зохион байгуулж болно. Энэ тохиолдолд дуудлага худалдааг зохион байгуулахгүйгээр шийвдэрлэнэ" гэж заасан байгаа.
Иймээс бид Капитал банкны өрөнд авсан орон сууцнуудаа ажилтан, алба хаагчиддаа зүгээр өгөөгүй. Харин ажилчид маань тухайн үнийн дүнгээр банкны зээлд хамрагдаад авах боломжийг нээж өгсөн. Тодруулбал, Капитал банкны хүлээн авагчаас 29 орон сууцыг хүлээн авсан. Тэгэхээр ажилтан, алба хаагчид маань банкны зээлэнд хамрагдаад, төлж буй мөнгө нь ЭМ-ын Даатгалын санд шилжин орох юм. Энэ бол ЭМДС-ийн тогтоолоор явж байгаа асуудал" гэх тайлбарыг өглөө.
