БЗС-ийн зээлээр дотоодод сурсан оюутнууд зээлээ эргэн төлөхгүй бол Монголбанкны муу зээлдэгчийн ангилалд ордог. Харин гадаадад сураад зээлээ эргэн төлөхгүй бол энэ жагсаалтад ордоггүй байна. Тиймээс БЗС-ийн зээлээр гадаадад сурсан ч бай дотоодод сурсан ч бай Монголбанкны муу зээлдэгчийн ангилалд оруулна гэв.
Энэ талаар БШУ-ы сайд Л.Энх-Амгалан "Дотоодын зээл авагчид зээлээ төлөхгүй бол Монголбанкны мэдээллийн санд бүртгэгддэг. Гэтэл гадаадын зээл авсан оюутнууд ингэж бүртгэгддэггүй. Тиймээс гадаадад сурсан, сурч байгаа оюутны зээлийн мэдээллийг Монголбанкны зээлийн мэдээллийн санд бүртгэдэг болно" гэсэн юм.
Одоогийн байдлаар БЗС-ийн зээлээр гадаадад суралцаад зээлээ эргэн төлөөгүй 230 хүн байгаа юм. Энэ 230 хүний нийт зээлийн дүн 27 тэрбум төгрөг. Үүнээс дөнгөж 250 гаруй сая төгрөг төлөгдөөд байна.
