Төрийн албаны зөвлөл 2021, 2022 оны тайлангаа энэ долоо хоногт УИХ-аар хэлэлцүүллээ. Авлига, албан тушаалын гэмт хэрэгт холбогдсон хүнийг төрийн албанд томилохгүй байх хуулийн зохицуулалттай. Энэ хууль хэрхэн хэрэгжиж байгаа тухай болон төрийн албан хаагчдын ёс зүйн талаар Төрийн албаны зөвлөлийн гишүүн Б.Идэрчулуун мэдээлэл өгсөн юм.
Тэрээр "Төрийн албаны тухай хуулийн 22.1-т заасны дагуу авлига, албан тушаалын гэмт хэрэгт шийтгэгдээгүй иргэнийг бид төрийн албанд томилдог. Төрийн алба хааж байхдаа аливаа төрлийн гэмт хэрэгт холбогдож тэр нь нотлогдож шүүхээр шийтгэгдэн таслан сэргийлэх тогтоол хүчин төгөлдөр болсон бол тухайн хүнийг халах хуулийн зохицуулалттай. Мөн төрийн албанд ажиллахыг хориглосон ялаар шийтгүүлсэн хүмүүс ажиллаж байсныг илрүүлж ажлаас нь чөлөөлүүлсэн. Төрийн албанд зохисгүй зүйл их байна. Хамгийн сүүлийн тоогоор 4042 төрийн албан хаагч гэмт хэрэгт холбогдсон. Энэ нь нийт гэмт хэргийн 15.6 хувийг эзэлж байна. Төрийн албаны зөвлөл хяналтаа хэрэгжүүлэн ажиллаж байгаа" гэлээ.
