АНУ-ын засгийн газар Украин улсад Patriot пуужин, HIMARS cистем зэргийг хамруулсан аюулгүй байдлын нэмэлт тусламжийн багцыг дэмжлэг болгон үзүүлэхээ зарлав.
Тодруулбал Төрийн департаментын зүгээс Конгрессын зөвшөөрөлгүйгээр АНУ-ын эзэмшилд байгаа аливаа илүүдэл зэвсгийг шилжүүлэх боломжийн хүрээнд ерөнхийлөгчийн гүйцэтгэх эрх мэдлийг ашиглан 500 сая ам.долларын үнэ бүхий зэвсэг техникийг олгохоор болсноо мэдэгдсэн байна.
Түүнчлэн дээр дурдсан зэвсгийн тусламжаас гадна тус улсын Батлан хамгаалах яам Украины аюулгүй байдлыг бэхжүүлэх зорилгоор 2.1 тэрбум ам.долларын зэвсгийн дэмжлэг үзүүлэхээ мөн цохон тэмдэглэв.
Энэхүү дэмжлэгт Patriot пуужингийн системийн нэмэлт сум, HIMARS системийн сум, NASAMS газар-агаар ангиллын пуужингийн сум, их бууны сум, хуяг эсэргүүцэх систем, бага оврын зэвсэг, хүнд техникийг тээвэрлэх машин, засвар үйлчилгээний дэмжлэг зэрэг багтаж буй аж.
Төрийн нарийн бичгийн дарга Энтони Блинкен уг шийдвэртэй холбогдуулан мэдэгдэл хийхдээ, энэ удаагийн тусламж нь Украинд халдан түрэмгийлсан ОХУ-ын утга учиргүй, шударга бус дайнаас өөрийгөө зоригтойгоор хамгаалах боломжийг олгоно гэж онцолжээ.
Эх сурвалж: YTN
