БНХАУ-ын дарга Ши Жиньпин цаг нь ирэхээр Украины Ерөнхийлөгч Владимир Зеленскийтэй мөргөлдөөнийг зохицуулах асуудаар ярилцана гэж мэдэгдэв. Энэ тухай Францын Ерөнхийлөгч Эммануэль Макронтой хамт Хятадад айлчилж байгаа Европын Комиссын тэргүүн Урсула фон дер Ляйен мэдэгджээ.
Тэрээр “Зеленскийтэй ярилцах хүсэлтэй байгаагаа Ши дарга баталсныг сонсоход сонирхолтой байлаа. Энэ бол эерэг дохио гэж бодож байна” гэж Хятадын удирдагчтай хэлэлцээ хийсний дараа Бээжинд болсон хэвлэлийн бага хурал дээр хэлжээ.
Ши Жиньпин Зеленскийтэй ярилцахаар төлөвлөж байгаа тухай Францын дипломат эх сурвалж Франс Пресс агентлагт мөн мэдээлсэн байна. Францын нэрээ нууцалсан дипломатчийн хэлснээр, Хятадын удирдагч хэлэлцээний үеэр Ерөнхийлөгч Макронд энэ тухай хэлсэн байна. Макрон мөн "Украины эсрэг дайнд ашиглаж болох зүйлээ Орост нийлүүлэхгүй байхыг Ши Жиньпинээс хүссэн" гэж хэлэлцээнд оролцсон дипломат нэмж хэлжээ.
Гуравдугаар сарын 29-нд Зеленский Ши Жиньпинийг Украинд айлчлахыг урьсан юм. Украины ерөнхийлөгчийн хэлснээр тэрээр жил гаруйн хугацаанд Хятадын тэргүүнтэй харилцаагүй байна гэжээ. Түүнчлэн гуравдугаар сарын эхээр "Wall Street Journal" сонинд Хятадын удирдагч ОХУ-д хийсэн айлчлалынхаа дараа Зеленскийтэй утсаар ярихаар төлөвлөж байсан тухай мэдээлжээ. Ши Жиньпин 3-р сарын 22-нд Москваас буцсан боловч тэр цагаас хойш Киев яриа хэлэлцээр болно гэсэн албан ёсны баталгаа аваагүй байгаа юм.
Хятад улс Украин дахь цэргийн ажиллагаанд төвийг сахисан байр суурийг баримталж байгаагаа мэдэгдэж, Украин, Оросын хооронд хэлэлцээрийг сэргээхийг дэмжиж байна. Украины Ерөнхийлөгч Владимир Зеленский өмнө нь Хятадын санал болгож буй энхийн төлөвлөгөөнд Оросын цэргийг Украины нутаг дэвсгэрээс гаргах тухай заалт байхгүй учраас хэрэгжих боломжгүй гэж мэдэгдсэн юм.
Эх сурвалж: Сentralasiamedia.