ОХУ-д суух АНУ тэргүүтэй 17 улсын шинээр томилогдсон элчин сайд нар тус улсын төрийн тэргүүн Владимир Путинд Итгэмжлэх жуух бичиг өргөн барих үеэр Путин Украины дайны хариуцлагыг АНУ болон Барууныханд тохсон мэдэгдлийг дахин хийв.
Орон нутгийн цагаар 5-ны өдөр Ройтерс болон Спутник агентлагийн мэдээлснээр, ерөнхийлөгч Путин мөн өдөр Москвагийн Кремлийн ордонд болсон ОХУ-д суух шинэ элчин сайд нарын Итгэмжлэх жуух бичгээ өргөн барих ёслолд оролцсон болохыг онцолжээ.
Энэхүү арга хэмжээнд Мексик, Гондурас, Оман, Парагвай, Сири зэрэг улсуудын элчин сайд нараас гадна АНУ-ын Элчин сайд Линн Трейси, Европын холбооны Элчин сайд Роланд Галхара, Дани улсын Элчин сайд Жейкоб Хеннингсен, Норвегийн Элчин сайд Роберт Квилл нар оролцсон аж.
"Дэлхийн аюулгүй хийгээд тогтвортой байдал шууд хамааралтай байдаг ОХУ болон АНУ-ын харилцаа ноцтой хямралд ороод буй билээ. 2014 оны Украины (Евромайдан) хувьсгалыг АНУ дэмжсэн явдал нь одоогийн Орос, Украины хооронд мөргөлдөөн үүсэхэд хүргэсэн” хэмээн олон нийтийн телевизийн сувгаар шууд дамжуулж байсан уг үйл явдлын үеэр Путин хэлсэн байна.
"Орос улс бусад орны дотоод хэрэгт хөндлөнгөөс оролцохгүй байх зарчимд суурилсан харилцааг үргэлж хадгалсаар ирсэн. Түүнчлэн бидний зүгээс АНУ-тай эрх тэгш, дотоод хэрэгт хөндлөнгөөс оролцохгүй байх зарчимд суурилсан харилцааг дэмжин ажиллахад бэлэн” хэмээн тэрээр нэмж дурдав.
Түүний хийсэн энэхүү мэдэгдэл нь Украин, Оросын хоорондох дайн 2014 онд Оросын талыг баримтлагч дэглэмийг Украинд түлхэн унагасан Евромайданы хувьсгалаар эхэлсэн бөгөөд Оросыг устгах гэсэн барууны хуйвалдааны улмаас нөхцөл байдал иймдээ тулсан гэх өмнөх байр суурьтай нь ижил байсан юм.
Путин Европын холбооны элчин сайдад хандан "Европын холбоо Оростой геополитикийн сөргөлдөөнийг эхлүүллээ. Энэ явдал нь бидний харилцаанд ноцтой хохирол учруулах болно” хэмээн цохон тэмдэглэжээ.
Тэрээр үргэлжлүүлэн “Бидний харилцааг сүйтгэж буй энэхүү үйл явдал хурдан дуусна гэдэгт найдаж байна" гэв.
Эх сурвалж: SBS
