Apple болон Disney компаниуд нэгдэх талаарх шинжээчийн үндэслэлтэй цуурхал Wall Street-д дахин дэгдэв. 2000-аад оны эхэн үед Wall Street-д яг үүнтэй ижил цуурхал дэгдэж байсан удаатай. Тодруулбал Apple компани Disney-г худалдаж авснаар тус компани өөрийн үнэ цэнг 25 хувь хүртэл өсгөх боломжтой гэдгийг шинжээчид таамагласан байна.
Өнгөрсөн сарын 30-ны өдөр АНУ-ын хөрөнгө оруулалтын Needham банк Apple компани Disney-г худалдаж авахтай холбоотойггор нэгэн нийтлэлийг олон нийтэд хүргэжээ. Тодруулбал тус банкны шинжээч Лаура Мартин “Хэрэв Apple Disney-г худалдаж авбал компанийн үнэ цэнэ 15-25 хувиар өснө. Энэхүү хоёр компани маань тус тусдаа байснаас хамтдаа илүү үнэ цэнийг бүтээж чадна” хэмээн онцолсон байна. Өнгөрсөн сарын 31-ний өдөр Нью-Йоркийн хөрөнгийн бирж дээр Apple компанийн хувьцаа 164,90 ам.долларт хүрсэн нь өмнөх өдрөөс 1,56 хувиар өссөн үзүүлэлт болжээ. Ингэснээр энэ оны эхэнд (1-р сарын 3-нд) 125,07 ам.доллар байснаас даруй 31,85 хувиар өсчээ.
Тус банк Apple компани Disney-г сонирхож буйн гол шалтгааны нэгээр “маш үнэнч хэрэглэгчид”-тэй гэх онцлогийг харгалзан үзснээ дурдсан байна. Хоёр компанийн бүтээгдэхүүнийг хэрэглэгчид тун үнэнч гэх тооцоог гаргасан тул техник хангамжийн платформоор хүчтэй Apple компани, контент үйлдвэрлэлийн салбартаа томоохон тоглогч Disney нар өөр өөрсдийн салбартаа бие биенийхээ бүтээгдэхүүний эрэлтийг нэмэгдүүлэх сайн талтай хэмээн тайлбарласан байна. "Apple компанийн хувьд 2 тэрбум гар утсанд контент түгээх боломжтой бол Disney дижитал дэлгэцээр (хөдөлгөөнт төхөөрөмж) дамжуулж болох контент бүтээхдээ тун чадварлаг билээ” хэмээн шинжээч Мартин цохон тэмдэглэв.
Байгууллагын соёл нь ижил төстэй байгаа нь мөн худалдан авах нэг үндэс болж болох талаар дурдсан байна. Apple болон Disney аль аль нь өөрсдийн салбартаа брэндийн имижийг нэгдүгээрт тавьж шийдвэр гаргадаг байгууллага гэдгээрээ алдартай. Чанартай бүтээгдэхүүнийг өндөр үнээр нийлүүлж ашгийн хэмжээг нэмэгдүүлэхэд анхаарч байгаагаараа ч мөн адил. Тус хоёр компани дэлхийн хамгийн том хэрэглээний зах зээл болох Хятадад ижил төстэй дарамттай тулгарч буй явдлыг ч Needham банк үүний үндэс болгон дурджээ.
2000-аад оны эхэн үеэс Стив Жобс Apple-ийн гүйцэтгэх захирлаар ажиллаж байх үед Disney-г худалдан авах тухай цуурхал Wall Street-д гарч байсан билээ. 2019 онд тус компанийн гүйцэтгэх захирал асан Боб Игер өөрийн намтарчилсан номондоо "Хэрэв гүйцэтгэх захирал Жобс амьд байсан бол Disney компанийг аль хэдийн Apple-д нэгтгэх байсан, эсвэл ядаж худалдан авах боломжийн талаар ярилцах байсан" гэж энэ тухай цуу яриаг өдөөсөн байна. Disney 2006 онд Apple-тай холбоотой Pixar компанийг 7.4 тэрбум ам.доллароор худалдаж авсан түүхтэй. Өнгөрсөн сарын 31-ний байдлаар Apple-ийн зах зээлийн үнэлгээ ойролцоогоор 2.609 их наяд ам.доллар болж, Disney компанитай харьцуулахад (182.9 тэрбум доллар) 14 дахин их байгаа юм.
Эх сурвалж: HankyungЖиргэхХуваалцах
