НАТО-гийн Ерөнхий нарийн бичгийн дарга Йенс Столтенберг хэлэхдээ, цэргийн мөргөлдөөн эхэлснээс хойш эвслийн орнууд Украинд нийт 65 тэрбум еврогийн үнэ бүхий зэвсэг нийлүүлсэн. Ойрын хугацаанд НАТО Украины армийн хэрэгцээнд зориулан "олон жилийн турш зэвсэг нийлүүлэх" хөтөлбөрийг бэлтгэж байна гэв.
Столтенберг эвслийн орнуудын Брюссельд болсон Гадаад хэргийн сайд нарын уулзалтын өмнө хэвлэлийн бага хурлын үеэр "Холбоотон орнууд Украинд 65 тэрбум еврогийн цэргийн тусламж үзүүлсэн бөгөөд орчин үеийн танк болон бусад хуягт тээврийн хэрэгслүүд Украинд ирж эхэлснийг би сайшааж байна" гэжээ.
Ойрын хугацаанд НАТО-гийн орнууд Украины Зэвсэгт хүчний сөрөг довтолгоог хүлээж байгаа бөгөөд Украинд үзүүлэх цэргийн дэмжлэгийг бэхжүүлэх бодолтой байна. ЗХУ үеийн зэвсгээс барууны зэвсэг рүү шилжихэд тус холбоо Киевт тусална гэж НАТО-гийн Ерөнхий нарийн бичгийн дарга тайлбарлав.
НАТО-гийн гишүүн орнуудын эрх баригчид төдийгүй Умард Атлантын эвслийн орнуудын цэрэг-аж үйлдвэрийн цогцолборын аж ахуйн нэгжүүд Украинд цэргийн тусламж үзүүлэхээр идэвхтэй ажиллаж байна гэж Йенс Столтенберг тайлбарлав.
Германы батлан хамгаалахын "Rheinmetall" концерн Украинтай хиллэдэг Румынд Киевийн хэрэглэж байсан зэвсгийн засвар үйлчилгээний төв барьж байгаа тухай өмнө нь мэдээлж байсан. Энд гаубиц, болон Герман, Их Британид үйлдвэрлэсэн "Ирвэс", "Челленджер" танкууд, мөн "Marder" явган цэргийн байлдааны машин, "Fuchs" хуягт тээвэрлэгч, цэргийн ачааны машинуудад засвар үйлчилгээ үзүүлэх юм.
Эх сурвалж: Сentralasia media
