Хөрш зэргэлдээ Беларусь улсад тактикийн цөмийн зэвсгээ байрлуулахаа мэдэгдсэн ОХУ уг мэдэгдлээ бодит болгож Беларусийн баруун хэсэгт буюу НАТО-гийн орнуудтай хиллэдэг хилийн ойролцоо цөмийн зэвсэг байрлуулахаар болжээ.
ТАСС агентлагийн мэдээлснээр, ОХУ-аас Беларусь улсад суугаа Элчин сайд Борис Гризлов орон нутгийн цагаар 2-ны өдөр хэвлэл мэдээллийнхэнд өгсөн ярилцлагадаа "Тактикийн цөмийн зэвсгийг Холбоотон улсуудын баруун хил рүү чиглүүлэн байрлуулах бөгөөд энэ нь манай аюулгүй байдлын чадавхийг нэмэгдүүлэх болно” гэж тэр хэллээ.
Хуучин ЗХУ-ын бүрэлдэхүүнээс гарч тусгаар тогтносон ОХУ болон Беларусь улсууд нь 1990-ээд оны сүүл үеэс эхлэн холбоотон улс байгуулах зорилгоор улс төр, эдийн засаг, цэрэг зэвсгийн чиглэлээр нягт хамтран ажиллаж ирсэн билээ.
ОХУ-ын баруун хэсэгт оршдог Беларусь улс нь баруун талаараа НАТО-гийн гишүүн Польш, Литва, Латви улстай 1250 километр орчим хиллэдэгээс гадна Оростой дайтаж буй Украин улстай мөн хил залгаа оршдог юм.
Оросын цөмийн зэвсгийг Беларусийн баруун хэсэгт байрлуулах энэхүү шийдвэр үнэн бол Төв болон Зүүн Европ дахь Украин болон НАТО-гийн гишүүн орнууд бай болж буй хэрэг юм.
"Итали, Бельги, Нидерланд, Герман, Турк зэрэг Европын орнуудад АНУ цөмийн зэвсгээ байршуулсан тул бид өөрсдийн аюулгүй байдлыг бэхжүүлэх арга хэмжээ авахаас өөр аргагүй" гэж Гризлов энэ үеэр цохон тэмдэглэсэн байна.
Тэрээр мөн Беларусийн нутаг дэвсгэрт цөмийн зэвсгийг байршуулахаар шийдсэн энэхүү шийдвэр нь Европ, АНУ-ын эсэргүүцлийг үл харгалзан төлөвлөгөөний дагуу явагдана гэж мэдэгдээд "Беларусь бол хууль ёсны дагуу холбоотон улсын нутаг дэвсгэр гэдгээрээ АНУ-ын цөмийн зэвсгийг өөрийн газар нутагт байршуулсан орнуудаас ялгаатай” хэмээн дурдсан юм.
ОХУ-ын ерөнхийлөгч В.Путин өнгөрсөн сарын 25-ны өдөр “Хоёр улс Беларусийн нутаг дэвсгэрт тактикийн цөмийн зэвсэг байршуулахаар тохиролцсон бөгөөд ирэх долдугаар сарын 1-ний өдөр гэхэд цөмийн зэвсгийн агуулахыг Беларусь улсад барьж дуусгана” хэмээн мэдэгдэж байсан билээ.
Эх сурвалж: MBC
