Арваннэгдүгээр сарын 15-нд Орос Украинд том хэмжээний пуужингийн цохилт өгсөн нь Оросын алсын тусгалтай пуужингийн нөөцийн тухай асуудлыг дахин сөхлөө гэж New York Times сонинд бичжээ. Тухайн өдөр ОХУ 96 пуужин харвасан нь хамгийн том цохилт байв.
Үүнээс урьд нь Украин болон барууны орнууд Оросын ийм зэвсгийн нөөц шавхагдаж, ингэснээр Украины чухал дэд бүтцийн объектуудыг буудах нь багасна гэж гэж олонтаа ярьж бичиж байв. Гэтэл ганцхан өдрийн хугацаанд тэд 96 пуужин харвав.
Шинжээчдийн дүгнэлтэд үндэслэн The New York Times Орос яагаад зургаан сар гаруй үргэлжилж буй дайны дараа ийм том цохилт өгч чадсан тухай дөрвөн хувилбарыг нийтэлжээ.
- Орос улс Хойд Солонгос, Иранаас пуужин худалдаж авдаг. Барууны тагнуулынхан Орос улс БНАСАУ-д сум нийлүүлэх хүсэлт тавьсан гэж мэдэгдэж байв. Тегеран Москвад далавчит пуужин болгон ашигладаг "Шахед-136" нисгэгчгүй онгоцыг хэдийнээс нийлүүлж эхэлжээ. Украины Агаарын цэргийн хүчний төлөөлөгч Юрий Игнат хэлэхдээ, Иран мөн Орост баллистик пуужин нийлүүлдэг гэжээ. Гэсэн хэдий ч Хойд Солонгос, Иран хоёр хоёулаа Орост зэвсэг худалдсанаа үгүйсгэдэг.
- Орос улс өөрөө зэвсэглэлээ нөхөж чадна. Jane's Defence-ийн хийсэн дүн шинжилгээгээр Орос улс зэвсэг үйлдвэрлэхэд шаардлагатай микрочип болон бусад эд ангиудыг урьдчилан нөөцөлж чадсан байж магадгүй юм. Үүнээс гадна пуужингийн үйлдвэрлэл дайн эхлэхээс өмнө ч хурдацтай байсан байж магадгүй бөгөөд одоо Оросын олон үйлдвэр гурван ээлжээр, долоо хоногийн долоон өдөр ажиллаж байна.
- Орос улс далавчит пуужингаас зенитийн пуужингаа түлхүү ашиглаж байна. Оросын цэргүүд газрын байны эсрэг агаарын довтолгооноос хамгаалах S-300 пуужинг хэдийнээс ашиглаж байгаа. Энэ нь газрын довтолгооны далавчит болон баллистик пуужингийн нөөц багассан гэж барууны мэргэжилтнүүдийг таамаглахад хүргэсэн.
- Орос улс НАТО-той дайтах тохиолдолд хэрэглэх их хэмжээний пуужингийн нөөцтэй байсан. Барууны орнуудад байгаа Оросын пуужингийн зэвсгийн тоо хэмжээг олон хүн мэдэхгүй байх. Гэвч НАТО-той дайн дэгдээх вий гэж Москва болгоомжилж, пуужингийн яаралтай нөөц бэлдэж байгаа гэж барууныхан үзэж байна.
Эх сурвалж: ВВС