Шойгу цэргүүддээ Херсоноос ухрах тушаал өгсөн нь дэлхий дахинд илүү олон асуултыг төрүүлж байна. Жишээлбэл, Украинчуудын амжилт энх тайвныг ойртуулж чадах уу гэсэн асуулт хамгийн түгээмэл байна.
Херсоноос цэргээ гаргаснаа албан ёсоор зарлахаас хэдхэн цагийн өмнө ОХУ-ын ГХЯ-ны хэвлэлийн төлөөлөгч Мария Захарова "Одоогийн байдлаар үүсч буй бодит байдлыг харгалзан Орос Украинтай хэлэлцээр хийхэд бэлэн хэвээр байна" гэж мэдэгдэв. Яг тэр "бодит байдлыг" харгалзан үзсэн түүний мэдэгдэл олны анхаарлыг татав.
Дайны үр дагаврыг дайны талбарт шийднэ гэж хоёр тал ойлгосноос болж Москва, Киев хоёрын хэлэлцээрийн бодит үйл явц зогсонги байдалд орсон гэж ВВС өнгөрсөн наймдугаар сард бичиж байв. Үүний зэрэгцээ, Орос улс хангамжийн асуудлыг шийдэх, дахин зрхицуулалт хийхийн тулд үйл ажиллагааны түр завсарлага авах шаардлагатай үедээ хэлэлцээрийн талаар дахин ярьж магадгүй гэдгийг Киевт хүлээн зөвшөөрч байсан юм.
Тухайлбал, дөрөвдүгээр сард Орос Киев, Чернигов мужаас цэргээ татсан бөгөөд үүнийгээ энхийн хэлэлцээг идэвхжүүлэхийн тулд "сайн санааны дохио" гэж тайлбарласан. Харин Украины эрх баригчид цэргээ гаргах болсон бодит шалтгаан нь Оросын арми эдгээр бүс нутагт бүтэлгүйтсэнтэй холбоотой гэж мэдэгдэж байв.
Ерөнхийлөгч Зеленский АНУ-тай ярилцсаныхаа дараа ОХУ-тай хээлцээр хийх байр сууриа зөөллөсөн тухай ВВС мэдээлсэн. Харин цэргийн шинжээч Роб Ли энэ сэдвээр хэлэхдээ "Одоо гал зогсоох нь Украины ашиг сонирхолд нийцэхгүй байна. Оросууд хэсэгчилсэн дайчилгаа явуулж, дайчдаа сургаж дадлагажуулж, Иранаас илүү их зэвсэг авахыг хичээж байгаа хэдий ч эдүгээ Украин цэргийн давуу талтай байна" гэжээ.
Украины Ерөнхийлөгч Владимир Зеленский тус улсын нутаг дэвсгэрийн бүрэн бүтэн байдлыг сэргээж, дайны улмаас учирсан хохирлыг нөхөн төлж, дайны гэмт хэрэгтнүүдийг шийтгэж байж хэлэлцээр хийхэд бэлэн гэдгээ мэдэгдсэн.
Зеленский мөн Днепр мөрний баруун эргээс цэргээ татах ОХУ-ын шийдвэрийн талаар хэлэхдээ: "Дайсан бидэнд бэлэг өгдөггүй, сайн санааны дохио зангаа илгээдэггүй" гэжээ.
Эх сурвалж: ВВС
