Бүгд найрамдахчууд Конгрессын доод танхимын сонгуульд Ардчилсан намыг бага зэргийн зөрүүгээр тэргүүлж байна
Шинжээчдийн таамаглалаар Бүгд найрамдахчууд арваннэгдүгээр сарын 8-нд болсон онгуульд Төлөөлөгчдийн танхимын 435 суудлын үнэмлэхүй олонхийг авах боломжтой байсан. Гэсэн хэдий ч арваннэгдүгээр сарын 9-ний өглөө гэхэд энэ итгэл найдвар биелсэнгүй гэж Associated Press тэмдэглэв. Харин ч Ардчилсан намынхан Бүгд найрамдахчуудын найдаж байсан хэд хэдэн тойргийг авч үлдсэнээс гадна заримыг нь өрсөлдөгчдөөсөө “булааж” чадлаа.
Одоогоор Бүгд найрамдахчууд Төлөөлөгчдийн танхимд тэргүүлж байгаа ч төсөөлж байсан шиг итгэлтэй биш байна. "AP" агентлагийн урьдчилсан тооцоогоор Ардчилсан нам Төлөөлөгчдийн танхимд 172 суудалтай хэвээр байгаа бол Бүгд найрамдахчууд 199 суудалтай хэвээр байна.
Танхимд хяналтаа тогтоохын тулд аль нэг нам 218 мандат авах шаардлагатай бөгөөд Бүгд найрамдахчууд илт давуу ялалт байгуулах тухай ярихад эрт байна.
Харин Сенатад олонх болох ялагчийг тодруулахын тулд хоёр дахь шатны шалгаруулалт шаардлагатай байж магадгүй юм.
100 суудлын 35-ыг авахаар болсон Бүгд найрамдахчууд Сенатад олонх болж, дээд танхимд хяналт тогтоохын тулд зөвхөн нэг мандат авахад хангалттай байв. Гэвч урьдчилсан тооцоогоор тэд эсрэгээрээ нэг байр алдсан байна. Тодруулбал, Пенсильвани мужид Бүгд найрамдах намаас сонгогдон чөлөөнд гарч буй сенатор Пэт Тумигийн оронд Ардчилсан намаас нэр дэвшсэн Жон Феттерман ялалт байгууллаа.
Ардчилсан нам Сенатад хяналтаа хэвээр хадгалж үлдэх эсэхийг шийдэх Сенатын 35 суудлын 4-ийн хувь заяа хараахан тодорхой болоогүй байна. Пенсильванид ялагдал хүлээсний дараа Бүгд найрамдахчууд Ардчилсан намаас хоёр суудал авах шаардлагатай болж байна. Ялангуяа Жоржиа мужид байдал сайнгүй байна. Бүгд найрамдах намын Хершел Уокер болон одоогийн Ардчилсан сенатор Рафаэль Уорнок нарын хоорондын зөрүү маш бага тул хоёр дахь шатанд өрсөлдөх боломжтой.
Эх сурвалж: Лента.ру