Украины Ерөнхийлөгч Владимир Зеленский АНУ-ын эрх баригчидтай хэлэлцээ хийснийхээ дараа Оростой энх тайвныг тогтоох хэтийн төлвийн талаарх байр сууриа бага зэрэг зөөлрүүлсэн гэж "Politico" сонин эх сурвалжаас иш татан бичжээ.
Зеленскийн даваа гарагт хэлсэн үгэндээ Оростой энх тайван тогтоох таван үндсэн нөхцөлийг жагсаан дурдсан тухай Америкийн хэвлэлд мэдээлжээ. Тус сонинд дурдснаар энэхүү нөхцлүүд нь гэвэл:
- -Украины нутаг дэвсгэрийн бүрэн бүтэн байдлыг сэргээх;
- -НҮБ-ын дүрмийг хүндэтгэх;
- -Дайны үеэр учирсан хохирлын нөхөн төлбөр;
- -Гэмт хэрэгт буруутай бүх хүмүүсийг шийтгэх;
- -Дайн дахин гарахгүй гэсэн баталгааг өгөх.
Үүний зэрэгцээ, тус хэвлэлд дурдсанаар Ерөнхийлөгч Владимир Путиныг засгийн эрхээс огцруулсан тохиолдолд л Москватай хэлэлцээ хийх боломжтой гэсэн өмнөх хатуу байр сууриа Зеленский энэ удаа дурдаагүй байна.
Түүний байр суурийн энэхүү өөрчлөлт Киев, Вашингтоны хооронд олон хоног үргэлжилсэн хэлэлцээ, түүний дотор АНУ-ын Үндэсний аюулгүй байдлын зөвлөх Жейк Салливан Зеленскийтэй нүүр тулан уулзсаны дараа гарсан гэж өөр бас нэг эх сурвалж хэлсэн" гэж зохиолчид бичжээ. Гэсэн хэдий ч Киев дайныг энх тайвны боломжийн нөхцлөөр зогсоох хүсэл эрмэлзэлээ харуулах ёстой гэж мэдэгдэв.
Кремль Украины дөрвөн бүсийг (Крымээс гадна) өөртөө нэгтгэхийг оролдсоны дараа Зеленский ОХУ-ын одоогийн ерөнхийлөгчтэй хэлэлцээр хийх бодолгүй байгаагаа өмнө нь нэг бус удаа хэлж байсан. Украины эрх баригчдын энэ зарчимд ямар нэгэн өөрчлөлт одоогоор ороогүй байгаа юм.
Америкийн хэвлэлүүд, тэр дундаа Washington Post, Wall Street Journal зэрэг хэвлэлүүд өмнө нь Салливан Зеленскийг дэлхийн хамтын нийгэмлэгийг өөрийн талд татахын тулд энх тайвны төлөө бэлэн байгаагаа харуулахыг санал болгосон гэж бичиж байв.
Үүний зэрэгцээ Вашингтон Киевийг ямар нэгэн буулт хийхийг албадахыг эрмэлздэггүй гэдгийг хэвлэл мэдээллийнхэн онцолдог юм.
Эх сурвалж: ВВС
