Цаг уур судлаач Йохан Рокстром Германы Frankfurter Allgemeine Zeitung сонинд өгсөн ярилцлагадаа 50 хүрэхгүй жилийн дараа Бразил, Энэтхэг, Африк, Ойрхи Дорнодын зарим бүс нутгаас агаарын температур нэмэгдсэний улмаас олноор нь цагаачилж эхлэх магадлалтай гэж мэдэгджээ.
Эрдэмтний таамагласнаар 2.4 градусын дулааралт нь дэлхийг урьдчилан таамаглах аргагүй, "гамшгийн" үр дагаварт хүргэж, амьдралын цоо шинэ нөхцөлийг бий болгоно. Магадгvй манай гаригийн нэг хэсэгт хvн амьдрахаа болино.
Ойролцоогоор 2070 он гэхэд экваторын ойролцоох дэлхийн ихэнх бүс нутагт хүмүүсийн амь насанд аюул заналхийлэх хангалттай халуун болно. Энэ нь Бразилийн ихэнх хэсэг, түүнчлэн Африк, Ойрхи Дорнод, Энэтхэгийн зарим хэсэгт хамаатай. гэж Рокстром тодотгожээ.
Эдгээр бүс нутагт жилийн дундаж температур 30 хэмээс давж, хүний амь насанд шууд аюул учруулж болзошгүй гэж цаг уур судлаач хэлэв.
"Урт хугацаанд тус бүс нутгийнхан зөвхөн агааржуулагчтай өрөөнд амьдрах боломжтой эсвэл цагаачлах хэрэгтэй болно. Цагаачлал нь ядуу хүмүүсийн хувьд цорын ганц гарц байх болно" гэж тэрбээр дурджээ.
Одоо ч гэсэн дэлхийн дундаж температур мөстлөгийн үеэс хойшхи хамгийн дээд цэгтээ хүрч байгаа аж.. Гренланд болон Антарктидын мөс хайлснаар манай гаригийн эрэг орчмын бүс нутгууд үерт автна гэж тэр таамаглажээ.
"Энэ тохиолдолд далай тэнгисийн усны түвшин долоон метрээр дээшлэх боломжтой. Ингэснээр Бангладеш болон Мальдив Мумбай, Манхэттэн, Гааг зэрэг газрууд асар том асуудалтай тулгарах болно" гэж цаг уур судлаач нэмж хэлэв.
Эрдэмтэд дэлхийн дулаарлын аюулын талаар байнга анхааруулдаг. 2015 онд 190 гаруй улс Парисын уур амьсгалын гэрээнд гарын үсэг зурсан. Үүний зорилго нь утааг багасгах, технологийн хувьд дахин тоноглох, одоо байгаа өөрчлөлтөд дасан зохицох явдал юм. Мөн сэргээгдэх эрчим хүчний эх үүсвэрийн эзлэх хувь нэмэгдэх төлөвтэй байна.
Эх сурвалж: РИА новости
