ХБНГУ-ын Саксон муж улсын эрүүгийн албаны ажилтнууд дөрөвдүгээр сарын 22-ны өдөр Германы альтернатив намын гишүүн, (AfD) Европын парламентын гишүүн Максимилиан Крагийн туслах Жиан Г-г Дрезден хотод саатуулсан байна. Холбооны Прокурорын газрын мэдээлснээр Жиан Г-г "Хятадын тагнуулын албаны ажилтан" гэж сэжиглэн баривчилсан бөгөөд энэ оны нэгдүгээр сард Европын парламент дахь хэлэлцээ, шийдвэрийн талаарх мэдээллийг үйлчлүүлэгчдээ дамжуулсан гэв. Жиан Г-ийг тагнуулын албаны даалгавраар Герман дахь Хятадын сөрөг хүчнийхнийг тагнасан хэрэгт мөн сэжиглэж байгаа аж.
Мөн өдөр ХБНГУ-ын Холбооны Прокурорын газрын хүсэлтээр дахин гурван герман иргэнийг тагнуулын үйл ажиллагаа явуулж, гадаад худалдааны хууль зөрчсөн гэж сэжиглэн саатуулжээ. Хятадын тагнуулын ажилтан гэх хэргээр Томас Р болон эхнэр нөхөр Хервиг, Ина Ф нар баривчлагдаад байгаа юм.
Мөрдөн байцаалтын явцад Томас Р. нь зуучлалын үйлчилгээ үзүүлдэг Ф.-ийн гэр бүлийн компанийн тусламжтайгаар цэргийн зориулалтаар ашиглаж болох шинэ технологийн талаарх мэдээллийг олж авсан байна. Мөн Германы шинжлэх ухааны судалгааны байгууллагууд, Германы их сургуулиудын нэгтэй шинжлэх ухааны бүтээлийг шилжүүлэх тухай гэрээ байгуулжээ. Хятадын талын түнш нь Хятадын Төрийн аюулгүй байдлын яамны ажилтан байсан бөгөөд уг төслийг БНХАУ-ын төрийн байгууллагууд санхүүжүүлсэн гэж Германы тусгай хэлтсүүд мэдэгдэв.