Өсвөр насны хөвгүүд нэгнээ зодож буй бичлэг цахим орчинд цацагдсан нь олны анхааралд өртсөн билээ. Цагдаагийн байгууллагаас бичлэгийн дагуу эрэн сурвалжлах шалгалтын ажиллагаа эхлүүлж, хөвгүүдийг олж тогтоожээ.
ЦЕГ-аас мэдээлсэнээр "16 настай Б, Г нар нь 16 настай М-ыг найз охин руу нь мэссэж бичсэн гэх шалтгаанаар зодсон байна. Шүүх шинжилгээний газраас шинжээч эмч томилоод зодуулсан хүүгийн биед ямар нэгэн гэмтэл учирсан эсэх үзлэгийг хийж байгаа. Баянгол дүүргийн цагдаагийн нэгдүгээр хэлтэс дээр мөрдөн шалгах ажиллагаа явагдаж байна" хэмээжээ.
Хүүхдийн биед учирсан гэмтэл, хохирол, хэргийн үүссэн шалтгааныг тодруулж байж, шүүхийн байгууллагаас хариуцлагын асуудлыг эцэслэн тогтоох юм. Хохирогч М-ын хувьд тухайн үед зодуулсанаа эгчээсээ нуусан бөгөөд цахим сүлжээнээс мэдсэн аж. Бусдад зодуулсан 16 настай хүүд өмгөөлөгч Т.Хонгор үнэ төлбөргүй өмгөөллийн үйлчилгээ үзүүлэхээр болсон байна.
