Дотоодын цэргийн 05 дугаар ангийн хугацаат цэргийн албан хаагч цэргийн албанд татагдаад тун удалгүй нас барсан харамсалтай хэрэг олны анхааралд байна. Түүний ходоодонд асуудал гарсан тул эмч нар яаралтай мэс засалд оруулж, мэс засал 6-7 цаг үргэлжилсэн боловч ухаан оролгүй байсаар нас барсан юм. Уг асуудлаар ХЗДХ сайд Х.Нямбаатар "Сургалтын төвд очсон алба хаагч тангараг өргөснийхөө дараа нас барсан асуудал гарсан. Хууль хяналтын байгууллага шалгалт явуулаад, шүүх эмнэлгийн шинжээч эмч нар задлан шинжилгээ хийсэн. Ходоод нь цоорсон гэсэн дүгнэлт урьдчилсан байдлаар гарсан. Одоогийн байдлаар эцсийн дүгнэлт гараагүй байна. Дүрмийн бус дэг хийсэн гэх асуудал шалгалтаар тогтоогдоогүй. Заавал нэг хүн дэглээд, ходоодыг нь цоо өшиглөсөн гэж хүмүүс ярих гээд байна. Гадна нь хөхөрсөн шарх сорви байхгүй байна. Одоогоор дүрмийн бус харилцааны асуудал тогтоогдоогүй" гэсэн юм.
Тэгвэл Дотоодын хэргийн 05 дугаар ангийн захирагч, хурандаа Ж.Мөнхсолонго "05 дугаар ангийн нэгдүгээр ээлжээр татагдан алба хааж байсан байлдагч зургаадугаар сарын 15-ны өдөр эрүүл мэндийн үйлчилгээнд хамрагдахад эрүүл байсан. Харин зургаадугаар сарын 16-ны орой артерын даралт нь доголдож эмнэлгийн тусламж авсан. Эмнэлгийн хариуны талаар бид мэдэхгүй. Цэргийн дасгал сургуулалт хийх орчимд 18 камер байдаг. Харин унтлагын өрөөний хоёр камер түр зуурын засвартай байсан" гэжээ.
Дотоодын цэргийн штабын дарга Р.Чингис "Дотоодын цэрэгт алба хааж байсан хугацаат цэргийн алба хаагч зургаадугаар сарын 17-нд нас барсан харамсалтай хэрэг гарсан. Ар гэр, төрөл төрөгсдөд нь гүн эмгэнэл илэрхийлье. Бид маш их харамсаж байна.
Зургадугаар сарын 15-нд тангараг өргөх ёслолын ажиллагаа болсон. Үүний дараа ар гэрийнхэн нь ирж эргэсэн. Талийгаачийн нагац ах, эхнэр нар нь зургадугаар сарын 17-ны өдрийн өглөө бидэнтэй уулзсан. Бүх талын туслалцаа дэмжлэгийг үзүүлж байгаа. Ямар ч тохиолдолд уг асуудлыг хуулийн байгууллага шалгах ёстой гэж үзээд Цагдаагийн ерөнхий газарт өргөдөл гаргасан. Ар гэрийнхэн ч Сонгинохайрхан дүүргийн цагдаагийн хэлтэст өргөдөл гаргасан байсан"
ЦЕГ-ын Хэвлэл мэдээллийн төвийн дарга, цагдаагийн хурандаа Б.Баатархүү "Байлдагчийг алба хааж байсан ангиас нь өнөөдөр сүүлчийн замд нь үдсэн. Энэ хүртэл бид мэдээлэл өгөхгүй байсан" гэлээ.
Цэргийн албанд цоо эрүүл гэж татагдаад, биеийнхээ гадна талдаа шарх сорвигүй, хэрэг гардаг үед нь 2 камер нь засвартай. Арьсаа хамгаална гэдэг энэ.