Гаалийн ерөнхий газрын эрх бүхий албан тушаалтнуудыг БНХАУ руу нүүрс тээвэрлэх үйл ажиллагаанд эрх мэдлээ урвуулан ашигласан хэрэгт холбогдуулан шалгаж эхэлсэн билээ.
Уг шалгалтын хүрээнд Гаалийн ерөнхий газар болон Гашуун сухайт дахь Гаалийн газрын эрх бүхий албан тушаалтнуудын орон байр, Нүүрс тээврийн чиглэлээр үйл ажиллагаа явуулдаг хэд хэдэн компаний захирал, тэдгээрийн оффиссын өрөө тасалгаанд өчигдөр буюу 2022 оны 06 сарын 09-ний өдөр нэгжлэг хийжээ. Тухайн байр, оффисоос эх үүсвэр тодорхойгүй их хэмжээний бэлэн мөнгө, гадаад валют илэрснийг авлигын холбогдолтой мөнгө байж болзошгүй гэж үзэж хураан авсан байна.
Гаалийн ерөнхий газраас энэ мэдээллийн мөрөөр тодруулахад "Өчигдөр нэгжлэг, шалгалт хийсэн нь үнэн. Манай байгууллагаас нэг хүнийг шалгасан байна. Гэхдээ энэ хүн гурван сарын өмнө сахилгын ёс зүйн хариуцлага алдсан гэдэг үндэслэлээр ажлаасаа халагдсан. Тэр алба хаагч нь дунд шатны буюу гаалийн улсын байцаагчаар ажилладаг байсан.
Энэ хүнтэй холбоотой хэрэг угаасаа шалгагдаж байгаа хэрэг. Харин Гашуунсухайтын хилийн боомт дахь Хилийн цэрэг болон гаалийн нэр бүхий ажилтнуудын орон гэрт нэгжлэг хийсэн мэдээлэл байна. Тэдгээрийн орон байраас нь бэлэн мөнгө илэрсэн гэх мэдээлэл одоогоор алга. Харин нүүрс тээврийн хэд хэдэн компанийн захирал, ажлын өрөөнөөс өрөөнөөс эх үүсвэр нь тодорхойгүй бэлэн мөнгө гарсан. Бид хэрэг шалгагдаж дуусахаар энэ талаар мэдээлэл өгөх болно." гэсэн тайлбарыг өглөө.