Олимпийн аварга Н.Түвшинбаяр өнөөдрөөс эхлэн ялтан боллоо. Түүнд улсын начин Э.Энхбат агсны амийг бүрэлгэж, эрүүл мэндэд нь ноцтой хохирол учруулсан гэмт хэрэгт яллаж, 16 жилийн хорих ялыг нээлттэй хорих ангид эдлүүлэхээр Хан-Уул дүүргийн шүүхээс шийдвэрлэлээ. Н.Түвшинбаярт яллах дүгнэлтийг танилцуулахын өмнө үгээ хэлэхийг шүүгчдийн зүгээс хүссэн. Тэрээр “Би буруутай, найзынхаа амийг хөнөөсөндөө харамсч байна, ар гэр, хань, үр хүүхдээс нь уучлал гуйж байна” хэмээгээд бүх галыг өөр дээрээ үүрээд шорон руу ачигдав.
Харин хэргийн газар болоод хэрэг өрнөсөн үйл явцыг анхааралтай ажиглавал Булган аймгийн Иргэдийн хурлын төлөөлөгч С.Гал-Эрдэнэ энэ бүхэнд хамгийн их буруутай билээ. Тэрээр Н.Түвшинбаяр, Э.Энхбат начныг зодож байхад “Хоорондоо учраа ол” гэж хэлээд хаалгаа гаднаас цоожлоод орхисон юм. Дотроосоо хаалга нь онгойж болохгүй байсан учир талийгаач аргагүй хүчинд автаж, амь насаа алдах шалтгаан болсон. Тэр ч байтугай Н.Түвшинбаярын эхнэр хэрэг болсны дараахан “Гал-Эрдэнэ хоорондоо алалцаг гээд өрөөнийхөө картыг аваад гарсан гэсэн” хэмээн хохирогчийн эхнэрт анх хэлж байсан хэрнээ одоо болохоор энэ талаар ам нээдэггүй нь хачирхалтай.
Талийгаачийн эмчилгээний зардалд 200 сая төгрөг хандивласан гэх мэтээр С.Гал-Эрдэнэ ихэд өмгөөлөв. Хоёр зуун сая байтугай төгрөгөөр үнэлэх аргагүй хүний алтан амийг хөнөөчихөөд мөнгө өгсөн хэмээн ихэрхэж зогсч буйдаа ичих хэрэгтэй. Шүүх хуралд хохирогчоор оролцож, өрөөний хогшил эвдэлсэн хэмээн 2,7 сая төгрөг нэхэмжилж, хохирогчийн дүрд тоглоод ичих ч үгүй “Шүүгдэгчид хуулийн дагуу ял оноохыг хүсч байна” хэмээн хэлээд зогсч байхдаа яаж ам нь эвлэж байна аа. Харин шударга шүүх байсан бол өнөөдөр Н.Түвшинбаяр С.Гал-Эрдэнэ, С.Ганзул нартайгаа хамт шүүгдэгчийн ширээний ард зогсч байх байлаа.
Булган нутгийн бахархал болсон хоёр хүүг хооронд нь алалцаг хэмээн орхиж яван, нэгийг нь шоронд илгээж, нөгөөг нь шороонд булуулсан чамд хүний үнэр байхгүй гэдгийг өнөөдөр Монгол даяараа харлаа. Хоёрхон жилийн дараа УИХ-д нэр дэвшинэ хэмээн хөөрч яваа бол хаа очсон газарт нь очиж амийг нь бид нэхэх болно. Өнгөрсөн сонгуулиар чи өсөх идэр өрнөн дэлгэрэх начин Э.Энхбат агсныг сүүдэр шигээ дагуулж явсныхаа хүчинд Булган нутгийнханд багахан танигдаж байсныг чинь булганчууд бүгд гэрчилнэ. Түүх өнөөдрөөр дуусахгүй, маргаашаар үргэлжилнэ. Өнөөдөр чи хууль шүүхийг аргаллаа ч хувь заяаны чинь шүүлтүүр чамайг хэрчиж хаях болно!!!
А.Бүддорж