ЭЦА-наас энэ сарын 9-нд буюу өчигдөр гүйцэтгэх ажиллагаа зохион байгуулсан талаар мэдээлсэн.
Эрүүгийн цагдаагийн алба, Авлигатай тэмцэх газар хамтран Хилийн цэрэг болон Гаалийн ерөнхий газрын эрх бүхий албан тушаалтнуудыг БНХАУ руу нүүрс тээвэрлэх үйл ажиллагаанд эрх мэдлээ урвуулан ашигласан хэрэгт холбогдуулан шалгаж эхэлсэн байна.
Тодруулбал, уг шалгалтын хүрээнд Хилийн цэргийн болон хилийн бүс дэх эрх бүхий албан тушаалтнуудын орон байр, Нүүрс тээврийн чиглэлээр үйл ажиллагаа явуулдаг хэд хэдэн компаний захирал, тэдгээрийн офиссын өрөө тасалгаанд өчигдөр буюу 2022 оны 06 сарын 09-ний өдөр нэгжлэг хийсэн бөгөөд тус шалгалтаар нүүрсний авлигын хэрэгт холбогдсон баримтаар тогтоогдсон талаар эх сурвалж мэдээллээ.
Хилийн цэргийн болон Гаалийн байгууллагын албан тушаалтнууд хамтран нүүрс тээврийн томоохон ААН-үүдийг авлига өгөх, авах, татвар төлөхөөс зайлсхийх, мөнгө угаах зэрэг хэд хэдэн хэрэгт холбогдуулан шалгаж байгаа аж.
Мөн тэдгээрийн хооронд Нүүрсний экспортын үйл ажиллагааны чиглэлээр авлигын томоохон бүлэглэл, сүлжээ үүссэн байж болзошгүй хэмээн үзэж шалгалтын ажиллагааг эхлүүлээд байгаа юм байна.