Олимпын аварга Н.Түвшинбаярт холбогдох хэргийн шүүх хурал Хан-Уул дүүргийн эрүүгийн хэргийн анхан шатны шүүхэд 2 дахь өдрөө үргэлжилж байна. Улсын прокуророос Н.Түвшинбаярыг "Хүний амь насыг санаатайгаар онц хэрцгийгээр хөнөөсөн, бусдын эд хөрөнгийг устгаж, гэмтээсэн" гэх яллах дүгнэлтийг шүүхэд оруулж ирсэн юм.
Шүүх хурлын үеэр Н.Түвшинбаярын өмгөөлөгч Л.Данзанноров "Талийгаач тухайн үед шууд нас бараагүй, найман сарын хугацаанд ухаангүй байж байгаад шархаа даалгүй нас барсан" гэсэн бөгөөд зүйл ангийг хөнгөрүүлж өгөхийг хүссэн юм. Л.Данзанноров “Хүнд гэмтлийн улмаас хохирогч нас барсан” гэх зүйл анги руу шилжүүлж өгөхийг шүүгчээс хүссэн. Тэрээр "Хүнийг таамгаар яллаж болохгүй. Эд зүйлээр цохисон нь тогтоогдоогүй, шинжилгээгээр ч батлагдсан. Харилцан зодолдож, түлхэлцсэн нь үнэн. Харилцан ноцолдож, зодолдоход талийгаач тавиур мөргөж, хүнд бэртэл авсан. Хаалга түгжээд хүнийг зодсон зүйл байхгүй. Тэр хаалга гаднаас нь хаахад дотроосоо түгжигддэг" хэмээсэн.
Улсын яллагч “Талийгаач хэдийгээр эмнэлэгт байхдаа нас барсан ч тухайн үедээ шууд клиник үхэлд орсон, дээрээс нь Н.Түвшинбаярын үйлдэл хөндлөнгийн хүмүүс очих үед ч хаалгаа тайлалгүй 8 минут үргэлжилсэн байна. Энгийн логикоор бодоход 8 минут хүнийг хэрцгийгээр зодох үйлдэл яах ч аргагүй хүний амь насыг онц хэрцгийгээр хөнөөсөн үйлдэл мөн гэж үзэж байгаа. Тийм учраас зүйл ангийг зөөлрүүлэх боломжгүй" хэмээлээ.
Яллагдагч Н.Түвшинбаяр: Энэ хэрэгтээ маш их харамсаж, маш их гэмшиж байна. Миний буруу. Цаашдаа насан туршдаа гэр бүлд нь тусалж дэмжинэ гэдгээ хэлье. Найзынхаа аав ээж, дүүнар, үр хүүхдүүд гэр бүлийнхнээс бүгдээс нь уучлалт хүсье. Гэм буруундаа маш их гэмшиж байна. Энэ хэрэгт холбогдож гэрчээр орж ирсэн бүх хүмүүсээч уучлалт гуйя. Эрхэм шүүгчид хандаж өмгөөлөгчийн минь хүссэн хуулийн дагуу шийдэж өгөөч ээ гэж хүсье" хэмээлээ.
Түүний өмгөөлөгч хохирогч хүнд гэмтлийн улмаас хохирогч нас барсан буюу эрүүгийн хуулийн 11.1.2.5 зүйл ангиар яллахыг хүссэн. Энэ зүйл заалтаар яллавал 5-12 жилээр хорих ял оноох юм.
Шүүх бүрэлдхүүн зөвлөлдөж шийдвэр гаргахаар ТҮР завсарлав.