Олимпын аварга Н.Түвшинбаярт холбогдох хэргийн шүүх хурал Хан-Уул дүүргийн эрүүгийн хэргийн анхан шатны шүүхэд 2 дахь өдрөө үргэлжилж Шүүх бүрэлдхүүн эцсийн шийдвэрээ гаргалаа. Шүүх хурлыг Хан-Уул дүүргийн Эрүүгийн хэргийн анхан шатны шүүхийн шүүгч Х.Одбаяр тэргүүтэй шүүгч нар яллагдагч Н.Түвшинбаярт 16 жилийн хорих ял оноолоо. Түүний өмгөөлөгч Н.Данзанноровын зүгээс хохирогч хүнд гэмтлийн улмаас хохирогч нас барсан буюу эрүүгийн хуулийн 11.1.2.5 зүйл ангиар яллахыг хүссэн. Энэ зүйл заалтаар яллавал 5-12 жилээр хорих ял оноох байсан ч Прокурорын зүгээс анхан шатны дүгнэлтээ дэмжсэн юм.
Өмгөөлөгч Н.Данзанноров эрүүгийн хуулийн 6.5.2-т зааснаар Шүүхийн зүгээс хэргийг хөнгөрүүлэх эрх мэдэл байгааг сануулсан. Улсын прокуророос Н.Түвшинбаярыг "Хүний амь насыг санаатайгаар онц хэрцгийгээр хөнөөсөн, бусдын эд хөрөнгийг устгаж, гэмтээсэн" гэх яллах дүгнэлтийг шүүхэд оруулж 19 жилийн хорих ял төлөвлөсөн юм. Харин прокурорын саналыг Н.Түвшинбаярын өмгөөлөгч Н.Данзанноров эсэргүүцэж шүүх хуралдаан дахин завсарлалаа. Ингэснээр шүүх бүрэлдэхүүн зөвлөлдөж шүүхээс Н.Түвшинбаярт прокурорын зүйлчилсэн зүйлчлэл тохирч байна үзлээ. Шүүхээс харин түүнд оноох хорих ялыг 16 жил болгон бууруулж, нээлттэй хорих ангид ялыг эдлүүлэхээр боллоо.
Мөн хохирогчийн талд оршуулгын болон бусад зардалд 2.7 тэрбум төгрөгийн төлбөр төлж дуусгасан гэж дүгнэлээ. Хэрвээ хохирогчийн тал хүлээн зөвшөөрөхгүй бол дахин нэхэмжлэл гаргах эрхтэйг шүүгч танилцууллаа. Н.Түвшинбаярт оноосон ялыг хохирогчийн талын өмгөөлөгч хүлээн зөвшөөрөхгүй гэдгээ мэдэгдэв.
Шүүгдэгч, түүний өмгөөлөгч, хохирогч, өмгөөлөгч нар нь шийтгэх тогтоолыг зөвшөөрөхгүй бол гардан авсан өдрөөс хойш 14 хоногийн дотор давж заалдах журмаар Нийслэлийн эрүүгийн хэргийн давж заалдах шатны шүүхэд гомдол гаргах, улсын яллагч, прокурор мөн хугацаанд эсэргүүцэл бичих эрхтэй гэдгийг шүүгч дурдлаа.