Нийслэлийн Аялал жуулчлалын газар “Монголын чопперчин ахан дүүс” ТББ-тай хамтран мотоцикл сонирхогчдын дунд “Талын салхи” олон улсын мото фестивалийг зургаадугаар сарын 11-ний өдөр зохион байгуулахаар болжээ.
Энэ удаагийн фестиваль “Эрүүл хүн-Архигүй Монгол” уриан дор зохион байгуулагдаж, 21 аймгийн мотоцикл сонирхогчид болон монгол туургатан улсуудын төлөөлөл 100 гаран мотоцикл сонирхогчид хүрэлцэн ирж оролцох ба зургаа дахь жилдээ зохион байгуулагдаж байгаагаараа онцлогтой.
Фестивалийн зохион байгуулалт болон арга хэмжээний талаар Нийслэлийн Аялал жуулчлалын газрын дарга Д.Батсүх мэдээлэл өглөө. Тэрбээр, "Энэхүү мото фестивалийг энэ жил зургаа дахь удаагаа зохион байгуулж байна. Өмнөх таван жилийн хугацаанд амжилттай зохион байгуулж, олон улсад нэр хүнд бүхий наадам болгон хөгжүүлсэн. 2019 онд зохион байгуулсан фестивалд ОХУ, БНХАУ буюу хөрш орнуудаас 200 гаруй мотоцикл сонирхогч оролцож байсан. Мөн Англи, Франц, Энэтхэг зэрэг улсаас аялагчид ирж оролцсон нь олон улсын фестивал болохын тод жишээ юм. Энэ жилийн арга хэмжээ нь цар тахлын дараах урлаг, спортын арга хэмжээ болж байгаагаараа онцлог юм.
Энэ жилийн наадам нь нийслэл Улаанбаатар хотын төв талбайд болох юм. Зургаадугаар сарын 11-ний өглөө фраданд оролцох мотоциклчид, холбоод, клубүүд маань Буянт-Ухаа нисэх онгоцны буудлын талбай дээр цуглаж, 13:30 цагийн үед төв талбайд ирсэн байхаар төлөвлөсөн" гэлээ.