УИХ-ын чуулганы баасан гарагийн хуралдаанаар Үндэсний баялгийн сангийн тухай хуулийг эцэслэн баталлаа. Түрүү долоо хоногт өргөн баригдаж байсан гэвэл долоо хоногийн дотор тус хууль УИХ-ын чуулганы босгыг давлаа.
Ерөнхий сайд, МАН-ын дарга Л.Оюун-Эрдэнийн хувьд Үндэсний баялгийн сангийн тухай хуулийг чухалчилж, нэн яаралтай журмаар батлахыг уриалаад байсан.
Тэгвэл өчигдөр эцсийн хэлэлцүүлгийг хийж, баталсан бөгөөд санал хураалтад оролцсон гишүүдийн 97.5 хувь нь дэмжжээ. Нийт 40 гишүүний ирцтэйгээр санал хурааж, 39 нь дэмжсэн гэсэн үг. Харин дэмжээгүй нэг гишүүн нь Ерөнхий сайд асан Н.Алтанхуяг аж.
Үндэсний баялгийн сангийн тухай хууль нь стратегийн ордуудыг төр зохицуулж, ашиг орлогыг нэгдсэн санд төвлөрүүлж, иргэдэд чиглэсэн тодорхой үйл ажиллагаанд зарцуулах Норвегийн баялгийн сангийн адил концепцтой.
