![](http://hardnews.mn/wp-content/uploads/2024/04/1A9C6E04-C284-4927-A017-7DDAB47830C3-1024x576.png)
С.Зориг агсны эхнэр Б.Булганы ярилцлага өчигдөр орой телевизүүдээр цацагдлаа.
Б.Булган 26 жилийн дараа анх удаа ам нээв гэсэн "сурталчилгаа"-тай тус ярилцлагын гол мессеж мэдээж Ц.Элбэгдорж байв. Ерөнхий сайд Л.Оюун-Эрдэнэ ч "Улаанбаатараас ярьж байна" нэвтрүүлэгт ярихдаа, ер энэ хаврын улс төр Ц.Элбэгдорж руу чиглэхээр байгааг нотлон мэдэгдсэн гэж болно.
Б.Булган ч Ц.Элбэгдоржийг нэрлэсэн. Тухайлбал, "Миний болон миний дотнын хүмүүсийн нэг ширхэг үс унавал захиалагч нь Ц.Элбэгдорж, гүйцэтгэгч нь Б.Хурц гэж хэлнэ" гээд цоллочихсон.
Э.Бат-Үүлийн тухай ч ярьсан юм. "Оросыг муулдаг, хөшөөтэй тэмцдэг хоёрхон ажилтай болж хувирсан. Араа бодвол дээр биз. С.Зоригийн үхлийн дараа Э.Бат-Үүл сайн хөлжсөн шүү дээ, түүнийгээ идэг" гэх мэтээр дурссан.
Үүнд нь харин Э.Бат-Үүл дуугүй байсангүй. Өмнө нь Ц.Элбэгдоржийг өмөөрөөгүй ч өнөөдөр, өөрийг нь хавчуулангуут дуугарлаа.
Тэр "Б.Булган өөрөө гүтгүүлэхийн зовлонг үзчихээд, гүтгэлгээр хорслоо тайлж байгаа бол бурхан чинь өршөөхгүй шүү. Ц.Элбэгдоржийг С.Зоригийн амь насны хэрэгт холбогдуулан гүтгэх ч бүр солиорч, цадигаа алдаж байна.
Тухайн үед Элбэгдорж, Ерөнхий сайдын үүрэг гүйцэтгэгч гэж балай юмнаас салахын түүс болж аргаа барж байсныг тэр үеийн эвслийн удирдлага бүгд мэднэ. Элбэгээ Зориг бид хоёрыг хүртэл “хойш суулаа” гэж уурлаж шахаж л байсан. С.Зориг дэд бүтцийн сайдын ажлаа хийж байх хүсэлтэй гэж миний хажууд хэлж л байсан. Фракцууд элдэв нэр санал гарган хоорондоо яриад найрцгааж байгаа дуулддаг л байсан. Дандаа л ингэдэг ш дээ. Надад фракц гэж байгаагүй. Гэтэл С.Зориг алагдсны дараа л Ерөнхий сайдад нэр дэвших гэж байсан болоод явчихсан. Би лав мэдээгүй.
Фракц гэж заваан юмны дэмийрэхийг харахаар ой гутаад хол явдаг байсан юм. С.Зоригийн нэр албан ёсоор ороод ирсэн бол Элбэгээ уухайн тас аваад л гүйх байсан. Тэр үүрэг гүйцэтгэгч гэж балай юмнаас салахын түүс болчихсон байсан юм шүү дээ. Үүнийг мэдэх гэрчүүд нь бүгд амьд байгаа шүү" хэмээн бичжээ.