МУИС 60 жилийн настай байруудаа нурааж, 18-25 давхар болгож шинэчилнэ-
Монгол Улсын Их Сургууль оюутан, багш, судлаачид, ажилтнуудынхаа сурч боловсрох, хөгжих, ажиллах, амьдрах тав тухтай “орчин, нөхцөл, боломж”-ийг бүрдүүлснээр өрсөлдөх чадвараа дээшлүүлж, олон улсын тэргүүлэх их сургуулиудын жишигт ойртоно хэмээн харж байна. Ингэснээр Азийн шилдэг 100 их сургуулийн эгнээнд багтах боломжтой гэж тооцоолж буй.
Тэд энэхүү зорилтынхоо хүрээнд хичээл сургалтын байруудаа нурааж, шинээр барихаар "МУИС кампус" төслийг хэрэгжүүлж эхэлжээ. Эхний ээлжинд хичээлийн гуравдугаар байр буюу МУИС-ийн Хууль зүйн сургуулийг нураахаар төлөвлөж, ажлаа эхлүүлээд байна.
-МУИС хичээлийн болон оюутны дотуур байруудаа шинээр барина-
Байршил, газар: Одоогийн байгаа байршлыг өөрчлөхгүй бөгөөд хуучин барилга байгууламжуудыг сэргээн засварлах, нураагаад шинээр барих бүтээн байгуулалтыг хийнэ.
- МУИС-ийн эзэмшил газрууд бүгд хамрагдана. Үүнд:
- Хичээлийн 1, 2, 3-р байр 33,918 мкв талбай
- Хичээлийн 4, 5-р байр 12,816 мкв талбай
- Хичээлийн 6-р байр 2,239 мкв талбай
- Байгаль эх лицей сургуулийн байр 11,389 мкв талбай
- Оюутны байр I 895 мкв талбай
- Оюутны байр II 879 мкв талбай
- Оюутны байр III 865 мкв талбай
- Оюутны байр IV 3,021 мкв талбай
- Оюутны байр V 890 мкв талбай
-Долоон жилийн хугацаанд бүрэн шинэчилж дуусгана-
МУИС энэхүү төслөө одоогоос зургаан жилийн өмнө буюу 2017 онд эхлүүлсэн юм. Энэ ажлын эхний үр дүн шинэ номын сангийн барилга байв. Харин одоо 2030 он гэхэд бүх барилгуудаа шинэчилж дуусгах юм байна.
Дэлгэрүүлбэл:
- Бэлтгэл үе шат 2017-2018 он
- Эхний үе буюу I ээлж 2018-2020 он
- Дунд үе буюу II ээлж 2021-2025 он
- Төгсгөлийн үе буюу III ээлж 2026-2030 он
Бүтээн байгуулалтын ажил:
- Барилга байгууламж
- Инженерийн дэд бүтэц шинэчлэл
- Ногоон байгууламж, тохижилт
- Зам, талбай, тохижилт
-МУИС-ийн хичээлийн төв байрыг 25 давхар болгож өргөтгөнө-
Энэ хичээлийн байрны барилгыг соёлын өв тул нураахгүй. Харин сэргээн засварлана. Мөн өргөтгөлийн 25 давхар байрыг барих юм байна. Үүний үр дүнд багтаамж 2-3 дахин нэмэгдэнэ хэмээн тооцоолжээ. Барилгын нийт өртөг 40.4 тэрбум төгрөг буюу 16.5 сая ам.доллар.
Одоогийн байрны нийт талбайн хэмжээ: 6`265 мкв гурван давхар бөгөөд 73 жилийн настай аж.
-Шинжлэх ухааны сургууль буюу хичээлийн хоёрдугаар байрыг нураана-
Тус барилгыг нурааж суурин дээр нь 18 давхар хичээлийн шинэ байр барина. Ингэснээр хүчин чадал багтаамж нь хоёр дахин нэмэгдэх юм. Нийт 65.7 тэрбум төгрөг буюу 26.8 сая ам.доллараар тус бүтээн байгуулалтыг хийхээр төсөвлөжээ.
Мөн 18 давхар барилгаас гадна тусад нь шинээр зургаан давхар барилгыг хоёрдугаар байрны дэргэд үйлчилгээний зориулалтаар ашиглана. Тодруулбал, тус байрны 1, 2 давхарт автомашины зогсоол, 3, 4 давхарт фитнесс, алжаал тайлах төв, эмнэлэг байрлах бол 5 болон 6 давхарт хоолны газруудыг шийдэх аж.
-Хууль зүйн сургууль буюу хичээлийн гуравдугаар байрыг буулгаж 18, 12 давхар хоёр барилгатай болгоно-
50 жилийн настай дөрвөн давхар тус барилгыг эхний ээлжинд буюу энэ хавар нурааж барилгын ажлыг нь эхлүүлэхээр төлөвлөөд байгаа юм байна. Ингэхдээ хичээлийн гуравдугаар байрыг хоёр байхаар төлөвлөсөн бөгөөд IIIА байр нь 18, IIIB байр нь 12 давхар. Нийт өртөг 49.3 тэрбум буюу 20.1 сая ам.доллар.
-Дөрөвдүгээр байрыг нурааж 23 тэрбумаар шинэ барилга барина-
Хичээлийн дөрөдүгээр байрыг анх 59 жилийн өмнө ашиглалтад оруулсан. Шинэчилж 12 давхар болгосноор одоогийн хүчин чадал, багтаамжийн хэмжээ гурав дахин нэмэгдэнэ. Мөн тус байрны дэргэд биеийн тамирын заал, фитнесс, усан сан, эрүүл мэндийн чийрэгжүүлэлтийн, аэробик төвийг багтаасан спорт цогцолборыг байгуулах юм. Цогцолборын нийт өртөг 7.9 тэрбум төгрөг буюу 3.2 сая ам.доллар.
-Гэр бүлтэй суралцагчдад зориулсан оюутны байр-
Байрны төрөл:
- Оюутны байр
- Гадаад оюутны байр
- Гэр бүлтэй оюутны байр
- Ахлах сургуулийн сурагчдын дотуур байр
Дээрх байр нэг тус бүрийг 11.9 тэрбум төгрөгөөр (4.9 сая ам.доллар) бүтээн байгуулна. Ингээд бодохоор нийт таван байрыг 59.5 тэрбум төгрөгөөр барина гэсэн үг (24.5 сая ам.доллар)
-Санхүүжилтийг хаанаас гаргаж, нийт хэдэн тэрбум төгрөгийг зарцуулах вэ-
Монгол улсын их сургууль эдгээр бүтээн байгуулалтдаа нийт 343.68 тэрбум төгрөгийг зарцуулах аж. Эх сурвалжийн мэдээллээс харвал санхүүгийн эх үүсвэрээ
- Дотоод нөөц, хуримтлал
- Улсын төсөв
- Зээлийн санхүүжилт
- Буцалтгүй тусламж
- Төр хувийн хэвшлийн түншлэлийн хөрөнгө
- Хандив
- Бусад гэсэн байдлаар шийдвэрлэх юм байна.
