АН-ын Хүний эрхийн хорооноос Д.Мөнх-Эрдэнийг суллахыг шаардаж, өнөөдөр /2023.09.21/ хэвлэлийн хурал хийлээ.
Ардчилсан намын хүний эрхийн хорооны гишүүд: “Иргэн Д.Мөнх-Эрдэнэ Ардчилсан намын гишүүн байснаараа хэлмэгдэж болохгүй. Энэ зөвхөн Ардчилсан намын хэрэг биш бөгөөд жирийн иргэн нь Д.Мөнх-Эрдэнийн араас очиж мэдэх эрсдэлтэй нийгэмд амьдарч байна. Хүний эрхийг зөрчсөн үйл ажиллагааг эсэргүүцэх, шударга шүүхээр шүүлгэх боломжоор хангах шаардлагад та бүхнийг нэгдээсэй гэж хүсэж байна. Үг хэлж, үзэл бодлоо илэрхийлснийх нь төлөө эрүүгийн хэрэг үүсгэдэг байдлыг Ардчилсан нам 2024 онд таслан зогсоох болно" гэлээ. Мөн тэд,
“Үзэл санааны хохирогч болсон Д.Мөнх-эрдэнэ гурван шаардлага хүргүүлсэн.
- Аав ээжийнх нь бие муу тул хоттой ойрхон хоригдох
- Хоригдох явцдаа хөдөлмөр эрхлэх
- Цахимаар холбогдох буюу эргэж очиход байнгын чагнаж, бичлэг хийж байгаа нь хүний эрхийг зөрчиж байна.
Монголд шинэ цагийн хэлмэгдүүлэлт бий болсон. Замд нь саад болсон бүхнийг хорьж байна.
“Өнөөдөр монгол улсад шударга тав гэдэг нөхдүүд талбай дээр зогсож 3.3 сая хүний итгэлийг хүлээж, төрд гарсан. Энэ хүмүүс өнөөдөр юу хийж байна вэ. Өөрсдөө үг хэлэх болохоор талбай дээр гэр барьж явсан. Бусад нь үг хэлэхэд цагдан хорьдог. Энэ шударга ёс уу. Ардчилсан нам 2012-2016 оны хооронд төр барих үеэр Ардын намынхан талбай дээр хар хайрцаг шатаасан ч, үзэл бодлыг нь сонсож байсан. Гэтэл өнөөдөр ганц хүн Төрийн ордны гадаа очоод Ерөнхий сайдад шаардлага хүргүүлэх гэхээр 10, 20 цагдаа авчраад хөөдөг нийгэм бий болчихсон байна”.
Эрүүгийн хэрэг хянан шийдвэрлэх тухай хуулийн 1.6-д “Шүүх, прокурор, мөрдөгч нар эрүүгийн хэрэг хянан шийдвэрлэх ажиллагаа явуулахдаа Монгол улсын Үндсэн хуулийн заалтуудыг чанд сахина” гэж заасан байдаг. Д.Мөнх-эрдэнийг сөрөг намын гишүүн болохоор ялгаварлан гадуурхаж байна” гэлээ.
