УИХ-ын дарга Г.Занданшатарын захирамжаар Нүүрсний сонсголыг зохион байгуулах Ажлын хэсгийн хуралдаан өнөөдөр Төрийн ордонд болж байна. Хуралдаанаар тус хорооны даргыг сонгосон юм. Хянан шалгах түр хорооны даргад ХЗДХ-ийн сайд Х.Нямбаатарын нэрийг УИХ-ын гишүүн Э.Бат-Амгалан дэвшүүлсэн бол УИХ-ын гишүүн С.Ганбаатар өөрийгөө дэвшүүлсэн аж. Ингээд ажлын хэсгийн гишүүдийн 55.6 хувийн саналаар Х.Нямбаатарыг түр хорооны даргаар сонголоо.
Нүүрсний сонсголыг зохион байгуулах Ажлын хэсэг хилийн боомтоор ачаа тээвэр, нүүрс нэвтрүүлэх болон чөлөөт бүсийн үйл ажиллагаанд учирч буй хүндрэл бэрхшээлийг шалган тогтоох түр хорооны даргыг сонгох асуудлыг хэлэлцлээ.
Тус хурлын үеэр "УИХ-ын гишүүн Т.Доржханд: Түр хороог сөрөг хүчин авч явах ёстой. Гэхдээ С.Ганбаатар гишүүний нэр орж ирж байгаад гайхаж байна. Нүүрсний пирамидын орой дээр нь байгаа толгойлогчтой хөтлөлцөөд орон нутгаар яваад байгаа шүү дээ" гэлээ.
Харин үүний хариуд УИХ-ын гишүүн С.Ганбаатар: Хэнтэй хөтлөлцөхөө би өөрөө мэдье. Би хараат бусаар ажиллаад ирсэн. Хүүхдийн асуултад ингэж л хариулъя" гэв.
