Авлигатай тэмцэх газар УИХ-ын гишүүн Б.Энх-Амгалангийн хэргийг шүүхэд шилжүүлэх саналтайгаар прокурорт хүргүүлсэн гэдгээ албан ёсоор мэдээлэв.
Өнгөрсөн хоёрдугаар сард Авлигатай тэмцэх газраас Говь-Алтай аймгаас сонгогдсон хоёр гишүүн болох Ш.Раднаасэд, Б.Энх-Амгалан нарыг нүүрсний гэх тодотголтой хэрэгт холбогдуулан яллагдагчаар татан шалгаж байгаа хэмээн мэдэгдсэн юм.
Харин УИХ-ын гишүүн Б.Энх-Амгалан “Шалгагдаж байгаа нь үнэн. Хуулийн дагуу мэдүүлэг энэ тэр өгч байгаа. Би хууль зөрчөөгүй, хулгай хийгээгүй, хэн нэгэнд давуу байдал олгоогүй. Монгол Улсын сайдад олгогдсон эрхийн хүрээнд хуулийн дагуу шийдвэр гаргасан. Нэг шуудай нүүрс, нэг хүрз шороо ч аваагүй. Ядмагхан зохиол биччихээд намайг гол дүрд нь тоглуулах гэж байна” гэх хариулт өгч байсан.
Тэгвэл зургаан сар шалгасны эцэст УИХ-ын гишүүн Б.Энх-Амгалангийн хэргийг шүүхэд шилжүүлэх саналтайгаар прокурорт хүргүүлжээ. Б.Энх-Амгалан гишүүнийг Зам тээврийн хөгжлийн сайдаар ажиллаж байхдаа албан тушаалын байдлаа ашиглан бусдад давуу байдал бий болгож, улсад хохирол учруулсан хэмээн Эрүүгийн хуулийн 22.1.3-аар яллагдагчаар татсан.
Тэгэхээр энэ намрын УИХ-ын чуулганы хуралдааны эхэнд УИХ-ын гишүүн Б.Энх-Амгалангийн бүрэн эрхийг түдгэлзүүлэх эсэх асуудлыг ерөнхий прокурорын зүгээс тавих бололтой.
Өөрөөр хэлбэл, нүүрсний гэх тодотголтой хэргээр хамгийн түрүүнд нэр дурдагдаж, яллагдагчаар татагдан шалгагдсан УИХ-ын гишүүн А.Адъяасүрэн, Т.Аюурсайхан, Ш.Раднаасэд, Ж.Мөнхбат, Н.Наранбаатар, Б.Энх-Амгалан нарын гишүүдээс хаврын чуулганаар гурван гишүүний бүрэн эрхийг түдгэлзүүлэх асуудлыг прокуророос оруулж, хоёр гишүүний бүрэн эрхийг түдгэлзүүлэн шалгаж байгаа бол намрын чуулганд хамгийн түрүүнд Б.Энх-Амгалан гишүүний нэр орж ирэх нь тодорхой болов.