Монгол Улсын Ерөнхийлөгч асан Ц.Элбэгдорж /2022.05.16/-ны өдөр өөрийн цахим хуудсаараа АН-ын нөхцөл байдал болон бусад цаг үеийн асуудлаар үзэл бодлоо илэрхийлж лайв хийсэн.
Энэ үеэр Монгол Улсын Ерөнхийлөгч асан Ц.Элбэгдорж "АН гурван зүйлийг маш тодорхой болгох хэрэгтэй. Нэгт, үзэл баримтлалаа маш тодорхой болгох хэрэгтэй. Өнгөрсөн 30-аад жилийн хугацаанд үзэл баримтлал янз бүр байсан. Бидний авч хэрэгжүүлсэн бодлого тухай бүрт АН-ынхаа үзэл баримтлалтай нийцээгүй зүйлс бий.
АН бол эх оронч, үндэсний эрх чөлөөг эрхэмлэгч нам гэж тодорхойлдог.
Ер нь, АН бол эх оронч эрх чөлөөг эрхэмлэгч нам гэж хэлэхээр хэн ч ойлгохоор байх хэрэгтэй.
АН бол хоосон зайн дээр гарч ирсэн нам биш. АН зүгээр нэг өлгийндөө байдаг нам биш.
Янз бүрийн зовлон үзэж ирсэн нам. Хоёрт, АН-ын дүрэм журам нь тодорхой байх хэрэгтэй гэж боддог. Бидэнд байж болохгүй олон зүйл байдаг.
Жишээ нь, УИХ-ын сонгуульд нэр дэвшигчдийг тулгаж зарладаг. Дунд шатных нь санал хаягддаг. Шалгуур нь тодорхойгүй байдаг. Гуравт, АН бол шинэ цагийн орчин үеийн нам байх ёстой. Хүнд суртал, авлига байх ёсгүй. Улс орны өмнө тулгамдаж байгаа асуудлыг шийдэхэд нь оролцдог байх ёстой" хэмээн байр сууриа илэрхийлжээ.
Түүнчлэн "Үндсэн хуульд өөрчлөлт оруулахын тулд нэлээн бодож, тал талаас нь тунгааж л хийх ёстой л доо. Яг шийдэх шаардлагатай зүйл байх юм бол тухайн асуудлыг шийдэж байх хэрэгтэй.
Заримдаа улс төрд шийдээгүй зүйл хамгийн сайн зүйл байдаг талтай. Ер нь, төрөөс гарч байгаа шийдвэр бүхэн оновчтой байдаггүй, тийм зүйл алга. Тэр УИХ-ын гишүүдийн тоог нэмэх асуудал бол зарчим биш. Гол нь нэг УИХ-ын гишүүн хэдэн хүнийг төлөөлөх вэ гэдэг талаасаа л бодсон нь дээр байх. Нэг УИХ-ын гишүүн 40 мянган хүнийг төлөөлнө гэвэл 88 гишүүнтэй байх тоо гарч ирж байна билээ.
Жишээ нь, 30 мянган хүнийг нэг УИХ-ын гишүүн төлөөлнө гэвэл 118 гишүүнтэй байх хэрэгтэй юм байна. Ер нь улс төрийн нам ард түмэнд хэрэгтэй байя гэвэл гар утас шиг л байх хэрэгтэй. Хүн бүрт гар утас хэрэгтэй байдаг шиг тийм нам байх л хэрэгтэй. Ерөнхий сайд нь ээлжит бус сонгуулийг зарладаг эрхтэй байх ёстой. Тэр өөрчлөлтийг хийгээгүй шүү дээ" гэлээ.