Ардчилсан улсын ардчилсан Ерөнхийлөгч зүүний үзэл гаргахыг харж явсан бид. Х.Баттулга бол ардчиллын буянаар мандаж, барууны үзэлтэй Ардчилсан намын далбаан дор Ерөнхийлөгч болсон. Гэвч тэр үргэлж зүүний үзэл суртал гаргаж ирсэнд намын нөхөд нь үлэмж дургүйлхэх болсон билээ. Сүүлдээ Х.Баттулгатай дайтах хэмжээний барууны буюу капиталист үзэлтнүүд гудманд гаран орилох болов.
-КАПИТАЛИЗМЫН БУЯНААР ТЭРБУМТНААС ТӨРИЙН ТЭРГҮҮН БОЛСОН НЬ-
Ардчилсан хувьсгалын буяныг хамгийн ихээр эдэлсэн цөөн хүмүүсийн нэг бол Х.Баттулга. Өөрөөр хэлбэл, эл хувьсгалын дараа том, том өмчүүдийг хувьчилж авсан. Дотор нь байсан сэйфтэй мөнгөөр нь авсан “Баянгол” зочид буудал, зооринд нь байсан махыг нь гаргаж зараад үнийг нь төлсөн хэмээх “Мах импекс”-ээс эхлээд “Талх чихэр” хүртэл социалист нийгмийн үлдэгдлээс хамгийн их хожсон хүн.
Нийгмийн шилжилтийн үед түрүүлж хөдөлсөн сэргэлэн нэгэн. Энэ утгаараа барууны капиталист дүр яах аргагүй мөн. Капитализмын буянаар Х.Баттулга Яармагийн зураачаас тэргүүн баяны нэг болтлоо хөлжсөн. Монголын тэргүүн ч болсон.
Ерөн оны цагаан морин жилийн ардчилсан хувьсгалаар "Женко" компаниа байгуулж, 2004 он хүртэл захирлаар нь ажилласан байдаг. МАН үнэмлэхүй олонхоор эрх барьж, олон нийт АН-ын хэнд ч саналаа өгөхөд бэлэн байх 2017 оны цаг үеийн нөлөө түүнийг Ерөнхийлөгч болгочихсон.
-ТӨРИЙН ТЭРГҮҮН БОЛУУТАА ЗҮҮНИЙ ҮЗЛИЙГ ХЭРЭГЖҮҮЛСЭН НЬ-
Төрийн тэргүүн болуутаа зүүний үзэл гаргаж, дарангуйллын араншин гаргаж эхэлсэн. Юу үнэн. Энэ үнэн. Тэрбээр “Та нарын баялгийг хулгайлсан зэрлэг капитализмын галзуурлыг өөрсдөө өөгшүүлж байна. Та нар ажилгүй, ядуу байгаа чинь баялагт эзэн суусан энэ бүлэглэлтэй шууд хамаатай” гэж хуурай агсарсан удаатай.
Гэвч баялагт эзэн суусан бүлэглэлийнх нь нэг нь тэр өөрөө хэдийн болчихсон байв. Капиталист хүний дүр мөртлөө зүүний үзлийг баримталж, ийм шинжтэй үйлдлүүд гаргаж эхэлсэн нь дараах хэд хэдэн зүйлээр батлагддаг.
- ШХАБ-т элсэнэ гэх мэдэгдэл гаргасан: Гадаад бодлогын хувьд огцом эргэлт хийгээгүй ч ШХАБ-д ойрын үед бүрэн эрхт гишүүн болно гэсэн мэдэгдэл нь улс төрийн том хэлэлцүүлгийн нэг болоод амжсан.
- Цаазын ялыг сэргээх тухай ам нээсэн
- Прокурор, шүүгчийг томилох үнэмлэхүй эрх нь байсаар байтал Ерөнхийлөгч байхдаа Авлигатай тэмцэх газрын дарга, Шүүхийн ерөнхий зөвлөлийн гишүүдийг томилох эрхийг авах гэж Үндсэн хуулийн цэцэд хүртэл хандаж явсан.
Эв нэгдлийн илэрхийлэгч энэ мэтчлэн дөрвөн жил хэрүүлийн алим шидсэн нь олон билээ.
Хамгийн сүүлд гэхэд л Жуковын хөшөөнд цэцэг өргөв. Энэ нь олон хүний нүдийг бүлтийлгэж, чихийг дэлдийлгэв. Дэлхийн ардчилсан үзэлтэй хүн бүхэн Путины түрэмгийллийг эсэргүүцэж байхад Х.Баттулга дэмжиж байна гэгдсэн.
-БАРУУНЫ ҮЗЭЛТЭЙ НАМЫН ТЭРГҮҮНИЙГ БУЛААЦАЛДСАН НЬ-
Гэвч одоо барууны үзэлтэй Ардчилсан намын тэргүүний суудлыг үхэн хатан булаацалдсан. Эхлээд төрийн тэргүүнээс буутлаа өөрийн төлөөний хүмүүсээ болгох гэж үзсэн. Урт удаан жонхуурал, хэд хэдэн сунгааны үр дүнд Ардчилсан намыг авч чадав.
СЭТГҮҮЛЧИЙН ТЭМДЭГЛЭЛ: Улстөрч имижээр биш тамирчин, бизнесмэн имижээр олонд танил болсон Х.Баттулгын хувьд Ерөнхийлөгч болох эв дүйгээ олох гэж чамгүй хичээсэн. Барууны намд ээнэгших, атгандаа авах гэж ч чамгүй улайрч буй. Тэрбээр анх АН-аас сонгогдсон Ерөнхийлөгч гэдэг утгаараа хөх даавуун дээлтэй байсан бол тэргүүний суудлаас буухдаа өнгө нь өөрчлөгдөж улаан болсноос өөрөөр өөрчлөлт гараагүй. Намаа хагалан бутаргаж, ард түмнийхээ ядуу зүдүү, ажилгүй байгаа нь Х.Баттулгын улс төрийн үр дагавар гэж буруутгагсад асар олон. Өнөөдөр гэхэд л төмөр замгүйгээсээ болоод нүүрсээ зарж чадахгүйдээ хүрчхээд байгаа нь үнэн билээ.
Сэтгүүлч П.Урнаа
Эх сурвалж: Eguur.mn
