Лхагва гарагт БНАСАУ-ын төрийн хэвлэл мэдээллийн агентлаг болох KCNA-ээс мэдээлснээр, тус улсын тэргүүн Ким Жон Ун холбогдох албаныханд цэргийн тагнуулын зориулалттай анхны хиймэл дагуулаа хөөргөхөд бэлдэхийг даалгажээ.
Тодруулбал, мягмар гарагт удирдагч Ким Жон Ун Хойд Солонгосын Үндэсний Сансрын судлалын удирдах газарт айлчилсан бөгөөд айлчлалын үеэр тэр тус улсын анхны тагнуулын хиймэл дагуулыг үйлдвэрлэх ажил дууссан болохыг хэлж, хэд хэдэн хиймэл дагуулыг хөөргөх тушаалыг өгсөн гэнэ.
Гэвч Хойд Солонгосын зүгээс ийн мэдээлж байгаа ч АНУ дахь Жеймс Мартины нэрэмжит Цөмийн зэвсгийг дэлгэрүүлэхгүй байх судалгааны төвийн ахлах судлаач Дэйв Шмерлерийн хэлснээр тус улсын сансрын хөлөг хөөргөх төвийн сүүлийн үеийн хиймэл дагуулын зургаас үзэхэд тэдэнд ойрын хугацаанд хиймэл дагуул хөөргөх гэж буй ямар ч шинж тэмдэг ажиглагдаагүй гэсэн юм.
Үйл явдлын хүрээнд Ким Жон Уны хэлснээр тагнуулын зориулалттай хиймэл дагуулыг хөөргөх нь тус улсын үндэсний аюулгүй байдлыг хамгаалах, газар нутгийн тогтвортой байдлыг хангахад чиглэнэ гэжээ. Түүний зүгээс тагнуулын хиймэл дагуул хөөргөх үйлдлээ өмгөөлсөн нь энэ бол тэдний үндэсний бүрэн эрхт байдлаа хадгалах, улс орон өөрийгөө хамгаалах эрхийн хүрээнд авч буй арга хэмжээ гэсэн юм.
Эх сурвалж: CNN
