Оросын энхийг сахиулагчдын хяналтад байдаг Лачины хонгилын /Армени болон Уулын Карабахыг холбосон 6 км уулын хонгил/ хил орчимд Армени, Азербайжаны хооронд дахин мөргөлдөөн гарчээ. Мөргөлдөөний улмаас хүмүүс амиа алдсан талаар талууд мэдээлсэн байна.
Орон нутгийн цагаар 16:00 цагийн орчимд Азербайжаны Лачин хотоос холгүй орших Арменийн газар нутаг дахь Тех тосгоны нутаг дэвсгэрт цэргүүд рүү нь гал нээсэн гэж Арменийн Батлан хамгаалах яам мэдэгдэв.
Арменийг Карабахын нэг хэсэгтэй холбодог зам энэ тосгоноор дайран өнгөрдөг юм байна. Оросын энхийг сахиулагчид энэ зам болон Армений анклавыг /тал талаасаа бусдын газар нутгаар хүрээлэгдсэн нутаг дэвсгэр/ хянадаг байна.
Азербайжаны Батлан хамгаалах яамнаас мөн Лачин хотын ойролцоо байсан Азербайжаны цэргүүд рүү Арменийн тал гал нээсэн гэж мэдэгдэв. Талуудын аль аль нь "хүмүүс амиа алдсан, шархадсан" гэж мэдээлжээ.
Армений Тех тосгон нь Азербайжаны Лачин хотоос 9 километрийн зайд оршдог. Замын хагасаас нь Оросын энхийг сахиулагчдын хяналтын бүс эхэлдэг байна.
Энхийг сахиулагчдыг 2020 оны арваннэгдүгээр сард Орос, Азербайжан, Армени гурван улсын байгуулсан гэрээний дагуу илгээжээ. Тэд армянчуудын амьдардаг Карабахын нэг хэсгийг хянадаг байна. Өмнө нь Лачин хотыг Арменийн тал эзэлсэн боловч 2020 оны намар 44 хоног үргэлжилсэн дайнд Азербайжан ялалт байгуулснаар буцаан авчээ.
Талууд 30 гаруй жил үргэлжилсэн цэргийн мөргөлдөөнд эдгээр нутаг дэвсгэрийн хилийн заагийг тогтоож чадаагүй юм.
Эх сурвалж: ВВС
