ОХУ-ын Алс Дорнодын Камчаткийн хойг дахь Шивелуч идэвхтэй галт уул идэвхжиж эхэлсэн тухай Спутник болон ТАСС агентлаг мэдээлэв.
Шивелуч галт уул нь орон нутгийн цагаар 11-ний өглөөний 5:44 цагт сэрж “үнс нурам нь 20 километрийн өндөрт цацагдсан” хэмээн ОХУ-ын Шинжлэх ухааны академийн Геофизикийн хэлтсийн Камчатка дахь салбараас мэдээлсэн байна.
Мөн галт уулнаас урсах лаав ойр орчмын 20 километр зайд тархсан тул хурдны замыг хааж болзошгүй нөхцөл байдал үүссэн болохыг мэдэгдэв.
Одоогоор Камчаткийн хойгт галт уулын үнс нурам тэнгэрт цацагдаж буйн улмаас нисэх онгоцны буудлын ашиглалтын аюулгүйн түвшинг хамгийн өндөр буюу “улаан дохиолол” болгон өөрчилсөн байна.
Түүнчлэн тус бүс нутгийн оршин суугчдыг шаардлагагүй тохиолдолд гадагш гаралгүй гэртээ байж, амны хаалт зүүхийг зөвлөж буйгаас гадна төрийн байгууллага, сургуулиудыг хаажээ.
Камчаткийн хойгийн төвд байрладаг Шивелуч галт уул нь дэлхийн хамгийн идэвхтэй галт уулуудын нэг юм.
Эх сурвалж: SBS
