Кристалина Георгиева: Эдийн засгийн өсөлт удаашрах үе тохиох гэж байна
Олон Улсын Валютын Сан дэлхийн эдийн засгийн ирэх таван жилийн өсөлтийн төлөв 1990 оноос хойших тус байгууллагаас танилцуулсан хамгийн сөрөг төсөөлөл болохыг анхаарууллаа.
Энэ хүрээнд улс орнуудыг геополитикийн сөргөлдөөнөөс үйлдэлтэй эдийн засгийн хагарал үүсэхээс сэргийлж, үйлдвэрлэлийг дэмжих алхам хэрэгжүүлэхийг зөвлөжээ.
Ирэх таван жилд дэлхийн эдийн засаг гурван хувиар тэлнэ гэж тооцоолсныг Олон Улсын Валютын Сангийн тэргүүн Кристалина Георгиева танилцууллаа. Энэ нь 1990 оноос хойших хамгийн тааруу өсөлтийн төсөөлөл болж байна. Үүнтэй харьцуулахад сүүлийн 10 жилд дэлхийн эдийн засгийн таван жилийн дундаж өсөлт 3.8 хувь байсан юм.
2023 оны хувьд дэлхийн дотоодын нийт бүтээгдэхүүний өсөлт гурван хувиас доогуур түвшинд байхыг тэрбээр мэдэгдэлдээ дурдлаа. Энэ нь дотоодын нийт бүтээгдэхүүн 2.9 хувиар тэлнэ гэж Олон Улсын Валютын Сангийн нэгдүгээр сард танилцуулсан төсөөлөлтэй дөхөж байна.
Олон Улсын Валютын Сан энэ онд дэлхийн хөгжингүй улс орнуудын 90 хувийнх нь дотоодын нийт бүтээгдэхүүний өсөлт саарах төлөвтэйг анхааруулж байгаа юм. Энэ нь бодлогын хүүг өсгөх бодлого эрэлтэд дарамт учруулж, АНУ болон Евро бүсэд эдийн засгийн идэвхжил удааширсантай холбоотой юм байна.
Зарим хөгжиж буй улсуудын эдийн засгийн өсөлт хөгжингүй орнуудтай харьцуулахад харьцангуй тогтвортой байгаа юм. Ялангуяа БНХАУ болон БНЭУ энэ онд дэлхийн эдийн засгийн өсөлтийн тал хувийг бүрдүүлнэ гэж тооцоолж байна.
Дөрөвдүгээр сарын 11-нд болох Олон Улсын Валютын Сан, Дэлхийн банкны 2023 оны хаврын уулзалтаар ОУВС дэлхийн эдийн засгийн төлөвийн илүү дэлгэрэнгүй тайлангаа танилцуулна.
Дэлхийн томоохон эдийн засгууд яг одоо ядуу буурай улс орнуудад дэмжлэг үзүүлэх боломж хязгаарлагдмал байгааг Кристалина Георгиева ярилцлагадаа онцолсон байна. Түүнчлэн тэрбээр ОХУ-ын Украин дахь дайн БНХАУ болон АНУ-ын харилцааг улам хурцатгаж байгааг дурджээ.
ОУВС-ийн тэргүүн Кристалина Георгиева
